Собранието на 16 февруари лани, пред да се распушти за предвремените парламентарни избори, со 80 гласа „за“ го донесе Законот за јавно обвинителство, но по повторено гласање
Опозициската ВМРО-ДПМНЕ го прозва претседателот Пендаровски дека не смее да потпишува указ за закон донесен во парламентот со двотретинско мнозинство
Пендаровски им порача забелешките за начинот на гласањето да ги достават до Уставниот суд, по што ВМРО-ДПМНЕ најавија дека Уставниот суд ќе мора да се изјасни
Уставниот суд за утре претпладне најави подготвителна седница за иницијативите за оценување на уставноста на Указот за прогласување на Законот за јавното обвинителство и Законот за јавното обвинителство од февруари лани.
Во најавата објавена на вебстраницата на Уставниот суд не се наведува кој ги поднел иницијативите.
Од прес-службата на Собранието вечерва соопштија дека претседателот на Собранието Талат Џафери ќе учествува на подготвителната седница во својство на претставник на Собранието.
Собранието на 16 февруари лани, пред да се распушти за предвремените парламентарни избори, со 80 гласа „за“ го донесе Законот за јавно обвинителство, но по повторено гласање. Првичното изјаснување спикерот Талат Џафери го поништи поради тоа што некои пратеници реагирале дека нивниот глас не е регистриран, откако на екранот се појавија 74 гласа „за“.
Претседателот Пендаровски веднаш го потпиша Указот за прогласување на Законот, иако опозициската ВМРО-ДПМНЕ го прозва дека не смее да потпишува указ за закон донесен во парламентот со двотретинско мнозинство.
Тогаш Пендаровски им порача и на нив и на секој граѓанин, забелешките за начинот на гласањето да ги достават до Уставниот суд како инстанца надлежна за одлучување.
Еден ден по донесувањето, потпретседателот на најголемата опозициска партија Александар Николовски во гостување на „Утрински брифинг“ најави дека правниот тим на ВМРО-ДПМНЕ ќе го разгледа начинот на кој се донесе Законот за јавно обвинителство за да видат дали има можности за дејствување. Според него, Уставниот суд ќе мора да се изјасни за повтореното гласање. Во поглед на содржината, како најспорен го гледа членот 110.
„Членот 110 обезбедува три амнестии. Обезбедува идна амнестија на сите функционери од СДСМ, вклучувајќи го и Заев за кој има индиции за сторен криминал. Според мене, обезбедува амнестија за дел од случаи кои се веќе отворени во редовното јавно обвинителство и обезбедува амнестија за оние од ВМРО-ДПМНЕ, од претходното раководство кои влегоа во сојуз со Заев. Членот 110 ја обезбедува оваа амнестија“,
кажа тогаш Николовски.
Донесувањето на Законот го поздравија и ЕУ и САД.
Пофалби од Брисел за донесувањето на Законот за ЈО
Брнс: Постигнат е значителен напредок во изминатите три години