Интерпелацијата поднесена од ВМРО-ДПМНЕ и коалицијата, како што соопштија од собраниската прес-служба, треба да се најде на дневен ред на првата наредна седница на Собранието, по истекот на 15 дена од денот на доставувањето на одговорот до пратениците
Претседателот на Собранието, Талат Џафери, денеска ја доби интерпелацијата која вчера ја поднесе пратеничката група на ВМРО-ДПМНЕ и коалицијата, а по која тој ќе постапи согласно роковите и процедурите предвидени во собранискиот Деловник, информира денеска прес-службата на Собранието.
Интерпелацијата треба да се најде на дневен ред на првата наредна седница на Собранието, по истекот на 15 дена од денот на доставувањето на одговорот до пратениците.
„Ако одговорот не се поднесе во рокот утврден во членот 46 на овој Деловник, интерпелацијата се става на дневен ред на првата наредна седница на Собранието“,
додаваат од прес-службата на Собранието.
Во соопштението се наведува и дека субјектот кому му е поставена интерпелацијата има право да достави писмен одговор на поставената интерпелација до претседателот на Собранието, најдоцна во рок од 15 дена од денот на приемот на интерпелацијата.
„Согласно член 49 став 1 од Деловникот, претресот по интерпелацијата трае еден работен ден, до исцрпувањето на листата на пријавените пратеници за збор, а се одлучува најдоцна до 24 часот“,
додаваат оттаму.
Вчера пратеничката група на ВМРО-ДПМНЕ и коалицијата поднесоа интерпелација за работата на претседателот на Собранието, Талат Џафери, за чие поднесување како дел од причините наведоа: кршење на Уставот и на собранискиот Деловник, нарушување на угледот на институцијата, самоволие, користење пцости во комуникацијата и омаловажување и навредување на пратениците.
Како непосреден повод се смета настанот кога Џафери побара заклучување на вратата на собраниската сала за да се пребројат присутните пратеници во неа. Од ВМРО-ДПМНЕ вчера при официјалното поднесување на барањето за негово отповикување побараа поддршка од сите пратеници.