ВМРО-ДПМНЕ денеска го повикаа Џафери да ја стави интерпелацијата на седница
Кршење на Уставот и на собранискиот Деловник, нарушување на угледот на институцијата, самоволие, користење пцости во комуникацијата и омаловажување, навредување на пратениците, се дел од причините за кои ВМРО-ДПМНЕ смета дека е одговорен претседателот на Собранието Талат Џафери.
Пратеничката група на опозициската партија денеска поднесе во интерпелација за неговата работа.
Како непосреден повод се смета настанот од средата вечерта кога Џафери побара заклучување на вратата на собраниската сала за да се пребројат присутните пратеници во неа. Од ВМРО-ДПМНЕ денеска при официјалното поднесување на барањето за негово отповикување побараа поддршка од сите пратеници.
„Апелираме до пратениците од СДСМ и мнозинството дека сега е моментот, кога треба да се стават настрана партиските договори и да застанат во одбрана на, пред сè човековите права, а потоа и во одбрана на Собранието на Република Македонија. Во спротивно, доколку не ја поддржат оваа интерпелација, ќе покажат дека не само што го оправдуваат ваквото однесување на Џафери туку и дека се дел од него“,
рече координаторот на пратеничката група на ВМРО-ДПМНЕ, Никола Мицевски.
ВМРО-ДПМНЕ денеска го повикаа Џафери да ја стави интерпелацијата на седница.
„Му порачуваме на Талат Џафери да ја стави оваа интерпелација на пленарна седница, а не како претходната да ја крие во фиока и доколку смета дека работи одговорно да даде аргументи пред целата јавност, а доколку повторно избега и не ја стави на седница ќе даде до знаење нема ни грам одговорност кон функцијата што ја извршува“,
изјави Мицевски.
Во образложението се набројува дека тој не ги ставал на дневен ред интерпелациите за министрите Љупчо Николовски и Бојан Маричиќ, поднесени за нив уште додека биле министри во претходната влада, не закажувал продолженија на пленарни седници кои биле од интерес за опозицијата, ненавремено доставувал материјали до пратениците, а и ги отфрлал амандманите поднесени од опозицијата спротивно на Деловникот.
Меѓу другото, во образложението за интерпелацијата се наведува и дека Џафери разрешувал членови на работно тело без претходна одлука за тоа од матичното работно тело, одземал право на говор на пратеник, но и дека не го користел македонскиот јазик како единствен службен јазик во меѓународните односи на Македонија.