Министерката за правда Рената Дескоска во интервју за „Фактор 24“ изјави дека работните групи меѓу власта и опозицијата воопшто не разговараат за евентуален нов мандат за актуелната специјална обвинителка Катица Јанева. Шефицата на ресорот правда, потоа се дообјасни дека нацрт-законот за кој досега се преговараше предвидува избор на новиот Специјален обвинител во Советот на јавни обвинители, тело кое е надвор од изршната власт.
„Јас сакам да потенцирам дека во досегашните разговори, воопшто не станало збор, значи кога разговараме ние како работни групи од министерството и политичките партии околу ззконот воопшто не ја ни споменуваме Катица Јанева. Значи нас не ни е во интерес да разговараме кој ќе биде Специјален јавен обвинител и тоа никогаш не било предмет на дебата и не не интересира. Значи, законот содржи кои се принципелни решенија. Кој се услови за избор на специјален јавен обвинител, кои се услови за избор на јавен обвинител на Македонија. Кои се услови за која е постапката и кој ќе ги бира. Значи воопшто не зборуваме за имиња. Така што, не го ставаме законот во светло и не сме оптеретени дали ќе биде Катица, дали ќе биде Фатиме, дали ќе биде Ленче или ќе биде некој сосема трет… Ние немаме ниту право да прифаќаме ни да не прифаќаме заради тоа што според нашиот предлог, специјалниот јавен обвинител го бира Советот на јавни обвинители. Тоа е тело што е надвор од извршната власт“,
изјави министерката Рената Дескоска за „Фактор 24“
Додека образложението на министерката е точно, дека извршната власт не смее да се меша во работата на Советот на јавни обвинители, точни се и изјавите на премиерот Зоран Заев од пред само четири месеци кога тврдеше дека Катица Јанева и тимот мора да останат во новото СЈО. Таков одговор даде и во интервју за МИА, откако почнаа првите разговори за новиот закон за СЈО со ВМРО-ДПМНЕ, при што еден од главните услови на опозицијата беше смена на Јанева.
„Апсолутно не. Тоа е за мене институционално прашање, од причина што навистина Катица Јанева и нејзиниот тим на обвинители, истражители и сите што работат беа во едно многу тешко време трошката надеж на враќање на правната држава, која ете почна да се враќа во нашата земја. Јас сум убеден дека не смееме да испраќаме лоши пораки до оние кои опстоиле, пркоселе, верувајќи во државата, во системот, во уставот и законите, во тешко време. Треба да ги поддржиме нивните капацитети. Јас ги слушам и критиките од опозицијата, и не дека немам разбирање за нив, но предностите на вака создадена институција, со овие луѓе е навистина голема предност за Северна Македонија“,
изјави Зоран Заев во интервјуто за МИА на 20 март 2019 година.
Катица Јанева беше избрана на функцијата на 15 септември 2015 година. Мандатот и трае 4 години, што значи уште околу два месеци. Изготвувањето на нов закон кој ќе го опфати СЈО е новиот приорет за земјата на патот кон ЕУ. За него сепак треба двотретинско мнозинство, што значи и компромис меѓу власта и опозицијата.