Дел од уредбите важат и по завршување на вонредната состојба, се до свикување на Собранието кое ќе може овие прашања да ги регулира со свои акти, објаснува министерката за правда
Уредбите со законска сила може да регулираат и дејствија по завршувањето на вонредната состојба, односно да регулираат мерки кои ќе имаат правно дејство и по завршување на вонредната состојба, објаснува министерката за правда Рената Дескоска. Тоа, како што вели, се однесува и на мандатот на ДИК, кој беше продолжен со Уредбата за изборните дејдствија.
Од друга страна, претседателот на ДИК Оливер Деркоски изјави денеска дека по завршувањето на вонредната состојба не важи владината Уредба туку Изборниот законик.
„Од денеска сме во редовна состојба во државата и важи Изборниот законик, а не некои уредби што ги донесе Владата за време на вонредната состојба. Четворицата членови на ДИК од СДСМ и Беса ми пуштија пред два часа барање за свикување на седница. Согласно деловникот имаат право да побараат, меѓутоа во барањето се повикуваат на уредбите, а според мене и според многумина во државата и експертска и друга јавност и Уставниот суд уредбите важат само додека трае вонредната состојба. Немам рок за одговор, но ќе им одговорам дали ќе закажам или не седница. Им оставам сами да одлучат како ќе постапуваат, а јас нема да учествувам во незаконити дејствија“,
изјави Деркоски за МИА.
Дескоска укажува дека Уставниот суд веќе се изјасни за времетраењето на уредбите со законска сила.
„Одлучувајќи да ја отфрли иницијативата за Уредбата со законска сила за примена на Законот за работните односи за време на вонредна состојба, Уставниот суд оправдано прифати дека не е неуставно уредбите со законска сила да може да регулираат и дејствија кои би се презеле во рокови и по завршувањето на вонредната состојба, односно да регулираат мерки кои ќе имаат правно дејство и по завршување на вонредната состојба“,
напиша Дескоска на својот фејсбук профил.
Ваквиот став на Уставниот суд, додава таа, е особено значаен за многу од мерките кои беа преземени за справување, особено со економските последици од епидемијата со ковид – 19, бидејќи е јасно дека е неопходно тие да имаат правно дејство и по завршување на вонредната состојба се до свикување на Собранието кое ќе може овие прашања да ги регулира со свои акти.
Таа потсетува дека, исто така, со Решението У.бр42/2020, Уставниот суд се изјасни и по однос на Уредбата со законска сила за прашања поврзани со изборниот процес и одлучи да не поведе постапка за оценување на уставноста.
„Уставниот суд вели: „очигледно е дека продолжувањето на мандатот на членовите на Државната изборна комисија се протега на период по завршување на вонредната состојба, но тоа е во согласност со целта заради која е донесена оваа мерка – непречено спроведување на предвремените избори за пратеници по престанокот на вонредната состојба, поради што има свое оправдување кое нема основ уставно-правно да се проблематизира“,
објаснува Дескоска.
Продолженото времетраење на правното дејство на уредбите со законска сила и по завршувањето на вонредната состојба, според неа, е во случаи кога со тие акти се уредува материја која е тесно поврзана со причината која предизвикала настанување на вонредната состојба и ако е соодветна мерката, како и ако уредбата со законска сила не „затвора“ некој правен однос настант пред прогласувањето на вонредната состојба.
„Мандатот на ДИК продолжува, матурантите може да бидат мирни – врз основа на уредбата ќе се запишат во септември на факултет без матурски испит, а оние кои примаат парична помош врз основа на уредба – ќе продолжат да ја примаат и понатаму“,
вели министерката за правда.