Тие имале контакт со 80-годишна пациентка која прво била негативна на коронавирусот, но вториот тест бил позитивен
Двајца лекари инфектолози, осум медицински сестри и четворица болничари од штипското Инфективно одделение се ставени во самоизолација, по наредба на здравствен санитарен инспектор, откако е утврдено дека имале контакт со 80-годишна пациентка, која била хоспитализирана со негативен тест на ковид 19 и дијагноза бронхопневмонија. Но, по влошувањето на состојбата и новиот земен брис, се покажало дека пациентката е позитивна на корона вирус.
Директорот на штипската Клиничка болница Ален Ѓеорѓијев вели дека од вчера е направена целосна реорганизација на ова одделение, на кое во моментов за пациентите се грижат еден инфектолог, еден специјализант, а на испомош ќе им дојде инфектолог од струмичката болница, јави МИА.
„Кадарот е пополнет со медицински сестри од другите одделенија, а во договор со Министерството за здравство ќе ни биде пратена една лекарка инфектолог од Општата болница во Струмица, која од утре ќе се вклучи во работата на Инфективното одделение“,
вели Ѓеорѓијев.
Во моментов, на ова одделение се хоспитализирани двајца пациенти со средна клиничка слика, кои се позитивни на коронавирус, а другите се лекуваат во домашни услови и се во секојдневен контакт со инфектолозите. Ѓеорѓијев вели дека по потреба тие се носат и на контроли во одделението. Според него, добро е што сите пациенти кои се во домашна изолација имаат добра здравствена клиничка слика.
Тој информира и дека на испомош на кумановската болница за наредните две недели имаат пратено еден лекар интернист. Апелира медицинскиот кадар кој во моментов е на првите борбени редови да се заштитува и да користи заштитната опрема, онако како што е пропишано. Донациите во опрема пристигнуваат секојдневно од фирми, но и од граѓани. Најави дека во понеделник ќе спроведе итна јавна набавка на заштитна опрема, која смета дека ќе биде доволна за наредните два месеца за вработените во болницата.