По отворањето на истрагата на Обвинителството за гонење организиран криминал и корупција во врска со набавките вршени од Државната изборна комисија (ДИК), претседателот Оливер Деркоски вели дека останува на тоа што го тврдел и претходно, дека тие воделе транспарентна и законска постапка.
Покрај Деркоски, осомничени во истрагата за злоупотреба на службената положба и овластувања се и тројца членови на Комисијата за јавни набавки во ДИК и сопственик на фирма. Една од набавките за кои се однесува истрагата е за софтверот во вредност од околу 900 000 денари, кој беше во фокусот на јавноста за време на последните парламентарни избори кога падна страницата на ДИК, додека другата изнесува 350 000 денари.
„Останувам на тоа што го имам кажано и досега, дека постапката е спроведена законски, а доказ за тоа е и отвореноста на постапката. Вградени се сите сугестии што беа дадени за оваа набавка, не се точни ниту наводите дека не е извршено тестирање, на околу 150 члена им биле пратени упатства и лозинки за да се тестира исправноста“,
вели Деркоски.
Тој вели дека до моментот кога го контактиравме не добил никакви официјални информации за отворената истрага.
За понудите за софтверот, Деркоски потсетува дека имало две, од кои била избрана пониската од околу 900 000 денари, додека другата била речиси 4 милиони денари. Во однос на транспарентноста на постапката која е предмет на истрага, тој повторно алудира и на досегашната пракса и наведува дека во 11 изборни циклуси претходно се склучувале договори за ваква набавка од над 4 милиони денари.
Ставот на Обвинителството, пак, е дека е прекршен Законот за јавни набавки од неколку аспекти: не било утврдено дека фирмата не ги исполнува условите за учество во постапката; не била спроведена правилна постапка за евалуација на доставените понуди во постапката за јавна набавка; не било објавено известување за поништување на постапката за доделување договор за јавна набавка во предвидениот законски рок. Покрај тоа, Обвинителството тврди и дека не било извршено тестирање и финален тест на софтверот пред тој да биде имплементиран и не бил извршен увид во спроведената постапка со преговарање, a извештајот од спроведена постапка бил изготвен спротивно на правилникот.
Постапката за софтверот, како што пишувавме и претходно, првично беше спроведена преку објавување на јавен оглас. Тогаш била избрана фирмата „Дуна“, но конкурентската фирма „Ивоте“ вложила жалба и Државната комисија за јавни набавки ја усвоила и ја поништила одлуката на ДИК за избор на фирмата „Дуна“.
Во образложението, меѓудругото, се наведува дека тогаш жалбата била основата бидејќи, како што објаснил жалителот, понудата од „Дуна“ била дадена без електронски потпис и без изјава за сериозност.
По ова постапката за набавка била спроведена по втор пат, но без објавување на оглас. Од ДИК ги повикале двете фирми на преговарање и истите дале понуди, по што поради пониска цена повторно била избрана „Дуна“. „Ивоте“ повторно поднела жалба, но истата била одбиена.
По денешното отворање на истрагата, „360 степени“ се обиде да добие став и од компанијата „Дуна“, но на телефонските броеви, кои се објавени на веб-страницата, не одговараше никој. Упативме прашање и по електронска пошта на наведената е-пошта, но добивме автоматски одговор дека поштенското сандаче е полно и не може да прима нови пораки.
За осомничените во оваа истрага, Обвинителството побара одземање на пасошите, забрана за работни активности поврзани со кривичното дело за кое се осомничени, забрани за напуштање на живеалиштата.
ОБНОВЕНО
Доцна попладнево, „360 степени“ стапи во контакт со директорот на „Дуна“, Александар Пејковски. Тој вели дека во овој момент не може да даде коментар затоа што сите информации ги дале до надлежните институции.
„Максимално сме кооперативни во истрагата и сметам дека нема потреба да изнесуваме во овој момент дополнителни информации. Можам само да кажам дека комплетно професионално и етички се однесувавме во постапката за јавна набавка. Паушалните наводи се злонамерни и непотребни и го нарушуваат угледот на компанијата, која постои и се развива веќе 27 година. На крај, предмет на набавката е апликација, која се инсталираше, беше тестирана, го изработи целиот тек на гласање и преглед на резултати, а на крај на краиштата, сè уште функционира“,
вели Пејковски за „360 степени“.