Претседателот на Државната изборна комисија Оливер Дерковски во вечерашното гостување на ТВ Алфа ги повика институциите да истражат како 11 изборни циклуси по ред тендерот за софтверско решение за прикажување на резултатите го добивала иста фирма и тоа преку т.н. договор во „четири очи“. Таквиот став го изнесе по упатените прашања за падот на софтверскиот систем веднаш по завршувањето на гласањето во средата, кој годинава за првпат го изработи компанијата „Дуна“ а не како што беше досега „iVote“.
Но, пред да стигне до повикот да се истражи досегашното доделување на тој тендер, Дерковски објасни како течела постапката годинава. Наспроти критиките, но и фактот дека договорот со „Дуна“ е потпишан две недели пред изборите, првиот човек на ДИК кажа дека постапката треаела многу подолго.
„Постапката за набавка на софтверско решение почна некаде на средината на април месец. Траеше до 18 јуни. Првиот пат постапката, кога се распиша тендер, одеше со класична набавка каде што се пријавија две фирми, Дуна и iVote кои учествуваа на јавната набавка и на јавното наддавање со спуштање на цената. На таа набавка цената се спушти, некаде мислам дека Дуна имаше 890 000 денари а iVote ја спушти цената од почетните 4 800 000 денари на 1 190 000 денари. После тоа имаше жалба до Државната комисија за жалби по јавни набавки која ја прифати жалбата на фирмата со повисока цена, бидејќи првата фирма не закачила на сајтот изјава за сериозност. Но Државната комисија за жалби по јавни набавки ни укажа и дека во тендерската спецификација која ја изработила комисијата за јавни набавки во ДИК премногу се фаворизира една фирма, односно практично насликала една фирма. А фирма која 11 циклуси наназад беше носител на тој договор беше iVote и тоа без јавна набавка“,
објасни Дерковски.
Откако тендерот бил поништен, кажа Дерковски, дал налог новата набавка да се прави со спуштени критериуми бидејќи така барала Државната комисија за жалби по јавни набавки, а со цел да се зголеми конкуренцијата.
„Комисјата ги имплементираше тие насоки за да ја зголемиме конкуренцијата во постапката, односно да ги ублажи тие критериуми што беа премногу видливи дека треба некој да ја добие таа постапка. Потоа, донесовме одлука за нова постапка и поради неизвесноста кога ќе бидат изборите, одлучивме да одиме на постапка со преговарање согласно Законот за јавни набавки. Повторно се повикани двете компании. Едната компанија даде понуда 900 000 денари, другата даде понуда 3 800 000 денари. После тоа заврши процесот, донесовме одлука за избор и се пристапи кон склучување на договор. Интересно е што повторно имаше жалба и по втората одлука и жалбата беше отфрлена од Државната комисија за жалби по јавни набавки, каде што се потврди решението на нашата комисија за јавни набавки за правилното постапување по нивните насоки“,
изјави Дерковски.
Својот одговор Дерковски го продолжи со прашање.
„Е сега тука се поставува едно друго прашање – како и зошто 11 изборни циклуси се склучувал договор во четири очи за 4 500 000 денари?“,
изјаи Дерковски.