Девојче од Петриња, пет лица во Мајске Полјане кај Глина и маж од Жажине се седуммината кои ги изгубија животите во разорниот земјотрес од 29 декември со епицентар кај Петриња, а неколку десетици беа повредени
Со знамиња на половина копје на сите државни и локални институции, во Хрватска денеска им се оддава почит на жртвите од катастрофалниот земјотрес што на 29 декември ги погоди централните делови на земјата, и во кој настрадаа седум лица, а предизвика голема материјална штета.
Девојче од Петриња, пет лица во Мајске Полјане кај Глина и маж од Жажине се седуммината кои ги изгубија животите во разорниот земјотрес со епицентар кај Петриња. Неколку десетици беа повредени.
Според проценките, оштетени се повеќе од 2 000 објекти. Уништени се бројни куќи, згради и институции, а најмногу страдаше центарот на Петриња, кој е речиси срамнет со земја.
Голем број од жителите на Петриња, Сисак, Глина и околните села останаа без покрив над главата. Штети има и во окрузите Загреб и Крапина-Загорје, но и во Загреб.
Од сите делови на Хрватска, државните и локалните институции и самоуправата, приватни компании, здруженија, друштва и самите граѓани испраќаат храна, облека како и финансиска помош, а бројни волонтери и членови на цивилната заштита се на терен.
Во земјата пристигнува и меѓународна помош.
Јачината на земјотресот што се случи на 29 декември во 12,19 часот беше 6,2 степени според Рихтер, а интензитетот во епицентарот бил VIII-IX степени според Европската макросеизмичка скала.
Земјотресот се почувствува низ цела Хрватска, но и во регионот. Од разорниот земјотрес до денеса, областите секојдневно се погодени со неколку потреси дневни, кои се значително послаби.