Демири со барање до Владата: Итна промена на компресорската станица во хируршките сали, се работи за човечки животи

„Напоменувам, се работи за живот на луѓето и се работи за државен интерес. Како министер за здравство замолувам и се надевам дека ќе имаме разбирање за истото, иако сум свесен дека се наоѓаме во изборен процес пред формирање на нова влада. Но, животот на луѓето и државните интереси се поважни од се“, рече министерот за здравство

Итно и неодложно да се пристапи кон промена на компресорската станица и инсталацијата на истата, како и сите придружни елементи за непречено и континуирано функционирање на хируршкиот блок.

Ова, според објавата на социјалната мрежа Фејсбук на профилот на Министерството за здравство, го побарал министерот за здравство Илир Демири со допис до Владата. Тој бара итно и неодложно да се направи промена на компресорската станица за да проработат хируршките сали на Клиничкиот центар во Скопје, кои веќе 13 дена се затворени.

„Напоменувам, се работи за живот на луѓето и се работи за државен интерес. Како министер за здравство, замолувам и се надевам дека ќе имаме разбирање за истото, иако сум свесен дека се наоѓаме во изборен процес пред формирање на нова Влада. Но, животот на луѓето и државните интереси се поважни од се“,

пишува во дописот кој Демири го испратил до Владата.

Демири пред неколку дена на прес-конференција рече дека хируршките сали во меѓувреме за потребите на итните случаи ќе се снабдуваат со кислород и компримиран воздух преку надворешни компресори. За полесните пациенти на кои им е потребна хируршка интервенција, тој рече дека ќе се препраќаат во болниците „Св. Климент Охридски“ и „8 Септември“

Додека германска фирма и обвинителството не ги откријат причините за мистериозната миризба, хируршките сали на Клинички ќе останат затворени

Тој кажа и дека пред еден месец имало хаварија на компресорската станица, во која бил констатиран дефект на еден од компресорите, кој бил исклучен, по што Клинички продолжил да функционира со два компресора.

Според него, некаде пред 30 години се градени тие хируршки сали и поставена е таа инсталација за снабдување со кислород и компримиран воздух.

Обвинителството ќе ги истражува причините зошто се затворени хируршките сали во Клиничкиот центар

Поради случајот со хируршките сали, Демири побарал и од обвинителството да спроведе истрага за случајот.

Прашан кој ќе ја понесе одговорноста затоа што со денови не работат хируршките сали во Клиничкиот центар „Мајка Тереза“ и колку директори од хирургија досега поднеле оставки, Демири одговори дека нема ниту една оставка која му е доставена.

Сопственоста на компресорската станица, како што рече, не е на Универзитетските клиники за хирургија и на КАРИЛ, туку на службите за општи и заеднички работи.

Од ВМРО-ДПМНЕ денеска посочија дека откако колабирал системот на одделите на хирургија во Клиничкиот центар „Мајка Тереза“, ниту еден од дванаесеттемина раководители и директори не се огласиле во јавноста.

Хируршките сали во Клиничкиот центар во Скопје повеќе од десет дена се затворени, а како причина за тоа е наведен непријатниот мирис кој се ширел во нив преку компресорскиот систем.