Од СДСМ велат дека предлог-декларацијата е политичко подметнување од опозициската партија и бараат оставка од Милошоски, за кого велат дека глуми „загрижен патриот“
Лидерот на ВМРО-ДПМНЕ и денеска апелираше СДСМ да ја прифати декларацијата, тврдејќи дека е неточна тезата дека неговата партија блокира во парламентот
Со мнозинство гласови на пратеници од владејачките партии, денеска, на седница на Комисијата за надворешни работи, беше одбиен предлогот за ставање на дневен ред на декларацијата за Гоце Делчев, која во Собранието ја поднесе пратеничката група на ВМРО-ДПМНЕ.
Претседателот на оваа Комисија, Антонио Милошоски од ВМРО-ДПМНЕ, соопшти дека пратениците на СДСМ и на ДУИ гласале „против“.
„На денешната Комисија за надворешна политика пратениците од СДСМ/ДУИ гласаа против декларацијата по повод 150-годишнината од раѓањето на Гоце Делчев, со што истата не беше усвоена“,
напиша на својот профил на Фејсбук пратеникот Милошоски.
Од СДСМ велат дека предлог-декларацијата е политичко подметнување од опозициската партија и бараат оставка од Милошоски од пратеничката функција, оценувајќи дека тој глуми „загрижен патриот“.
„Наместо да глуми загрижен патриот, Милошоски да се повлече од позицијата пратеник, затоа што не е достоен да ја врши оваа функција. Милошоски, човекот кој го нарекуваше Блаже Конески ‘џуџето од Небгрегово’, кој нарачуваше лустрација на Славко Јаневски е најмалку повикан да зборува за македонските национални интереси. Декларацијата е политичко подметнување од страна на ВМРО-ДПМНЕ со цел да се продлабочат поделбите во македонскиот народ“,
се наведува во реакција од СДСМ.
Од владејачката партија велат дека делото на великанот на македонското револуционерно дело и неговиот историски придонес во создавањето на македонската државност не заслужува ваков потценувачки однос.
„Гоце Делчев не заслужил да биде сведен на политичка декларација и тоа поднесена од партија која ги слави историските личности кои бил против Делчев, против неговите дела и вредности“,
велат од СДСМ.
Лидерот на ВМРО-ДПМНЕ, Христијан Мицкоски, и денеска апелираше СДСМ да ја прифати декларацијата, тврдејќи дека е неточна тезата дека неговата партија блокира во парламентот.
„Вчера ги слушам како вели дека местото за национално единство било во Собранието, а демек ВМРО-ДПМНЕ таму блокирала. Во основа и во суштина ова е неточна теза. Ако веќе така размислуваат, тогаш токму таму, во Собранието, се наоѓа декларацијата за македонскиот титан, Ѓорѓи Делчев, нека ја прифатат, а не да ја одбиваат како што тоа го направија. И доколку не им е прифатлива тогаш јавно нека кажат во кој дел не се согласуваат со содржината. Ако под единство во Собранието подразбираат да го поминат законот за марихуана, тогаш ниту за 100 години од сега нема да се согласиме, затоа што ВМРО-ДПМНЕ, додека јас сум претседател, бизниси на грбот на народот ниту ќе води, ниту ќе толерира“,
рече Мицкоски.
Минатата седмица, дел од пратениците на ВМРО-ДПМНЕ со маици со ликот на Гоце Делчев се појавија на седница на Комисијата за надворешна политика и побараа да се разгледува декларацијата што ја поднесе опозициската партија. Но, нивните колеги од СДСМ и ДУИ ја напуштија седницата.