Ракометниот свет денеска го потресе веста дека осум парови на елитни судии биле вмешани во вкупно 26 натпревари за кои постои висок сомнеж дека биле наместени, во перидот 2016-2017 година. Меѓу нив се и два натпревари кои ги суделе македонските судии Ѓорѓи Начевски и Славе Николов
Сторијата ја објави данската ТВ2, повикувајќи се на анализа на ракометни натпревари кои ги направила консултатнската куќа Спортрадар. Набрзо се јави ЕХФ од каде соопштија дека извештајот стар пет години е проверен па и испратен и на австриската полиција. Ниту едните, ниту другите, не нашле докази за местење
Една елитна судиска двојка од Северна Македонија и една од Хрватска се дел од вкупно осум ракометни судиски парови кои суделе 26 „сомнителни“ ракометни натпревари. Меѓу сомнителните натпревари има и такви од ракометната Лига на шампиони, а меѓу екипите кои играле на тие натпревари се добро познатите Веспрем, Киелце, Кил, Фленсбург.
Грубо, тоа се главните контури на сторијата на данската ТВ2 која го потресе ракометниот свет. Авторите на текстот, сепак, не се повикуваат на конкретни докази за местењето, туку на аналитички извештај на фирма-консултант која меѓудругото прави проценки за веројатноста одреден натпревар да е наместен. Вообичаено, тоа се прави со споредба на статистиките од еден натпревар и коефициентите и влоговите ставени во обложувалниците на одредени статистики.
Извештајот е стар пет години
Според данскиот медиум, извештајот го направила фирмата Спортрадар откако и пристапиле седум обложувалници поради „сомнителни“ суми на пари кои биле ставани на нерешен резултат после првото полувреме или на конечен резултат со помал број на голови (помалку од проценката на обложувалниците). Анализата на Спорадар ги дала резултатите – „сомнителни“ се 26 натпревари кои биле судени од вкупно 8 различни судиски двојки. Два од натпреварите ги судела македонската двојка Начевски – Николов, седум хрватската двојка Губица – Милошевиќ. Други имиња не се споменуваат.
Но во сторијата, се вели и дека извештајот се однесува на натпревари во периодот меѓу септември 2016 и ноември 2017 година. Извештајот бил изработен во 2018 година и предаден, меѓудругите и на ЕХФ (Европската ракометна федерација).
Во новинарскиот текст потоа се обвинува ЕХФ дека не презела ништо, особено што дел од судиите, како македонската двојка Начевски-Николов, судат и во моментов.
ЕХФ: Извештајот го провери и австриската полиција
По објавувањето на првичната сторија, Европската ракометна федерација се јави со објаснување дека штом го добиле извештајот, веднаш го препратиле до австриската полиција, која досега нема поднесено пријава.
„Во декември 2018 година, Европската ракометна федерација активно и веднаш ја препрати документацијата со која располагаат релевантните органи, поточно единицата за спортски интегритет, дел од одделот за организиран криминал, при федералните криминално-разузнавачки служби на Австрија, така што сите потребни истрагите на национално и меѓународно ниво би можеле веднаш да се започнат. Ова е бараниот и неопходен чекор во оваа работа бидејќи местењето натпревари е кривично дело кое треба да го истражува полицијата како одговорна институција. Според сознанијата на ЕХФ, до денес овие истраги на полицијата не дадоа никаков резултат и шпекулациите останаа непотврдени по истрагата“,
соопшти ЕХФ, пренесува МИА.
Европската ракометна федерација направила и сопствена истрага. Но ни таа не ги потврдила сомнежите од анализите на Спортрадар.
„Сопствените анализи на ЕХФ за спорните натпревари од спортска гледна точка во тоа време не донесоа докази што би го оправдале покренувањето правна постапка. Судиите не се суспендирани бидејќи ниту на страната на полицијата ниту на страната на ЕХФ не се утврдени суштински причини за ваквите чекори“,
стои во соопштението на ЕХФ
Судии демантираат
Данската ТВ2 им пристапила и на дел од судиите, поточно на македонската и на хрватската двојка. Судиите Начевски и Николов ги сретналево Малме, веднаш по нивниот прв натпревар на Светското првенство во ракомет, на кое се судии. Откако им бил презентиран извештајот на Спортрадар, одбиле да коментираат и заминале во хотелското лоби, пишуваат данските новинари. Начевски и Николов суделе два од „сомнителните“ натревари во периодот септември 2016 – ноември 2017 година.
Хрватскaта двојка Губица – Милишевиќ дале интервју за медиумот и ги отфрлиле сите обвинувања. Изјавиле дека немаат никакви сознанија за извештајот и дека полицијата никогаш не ги контактирала. Кога биле соочени со информацијата дека има сомнителни опклади на нерешен резултат на натпревари кои тие ги суделе, Губица одговорил:
„Има безброј нерешени резултати во натпревари кои сме ги суделе. Кажете ми, дали ние судиите сме единствените на теренот?
-Дали имплицирате дека е можно тимовите да се вклучени?
Најлесно е да се кажа дека виновни се судиите. Но ние не сме единствените на теренот“,
изјавил Губица.