Трајковски е еден од ретките кому Русковска му постави прашање, додека во неколку наврати на денешното рочиште коментираше дека сите сведоци се повикани за исти околности, а ја обвини одбраната и дека ги злоупотребува своите права
Дали и рушењето на „Космос“ претставува партиски проект, го праша обвинителката Вилма Русковска поранешниот градоначалник на Гази Баба, Тони Трајковски, на судењето за организацијата на настаните од 27 април 2017, на кое тој денеска беше повикан како сведок. Инаку, тој е обвинет во предметот ТНТ, кој се однесува токму на рушењето на комплексот на Фијат Цаноски, во периодот кога тој беше градоначалник.
Прашањето на Русковска, кое не беше дозволено, следуваше откако претходно Трајковски на прашањата на одбраната негираше дека на состаноците на Градскиот комитет на ВМРО-ДПМНЕ се разговарало и се носеле одлуки за протестите „За заедничка Македонија“. На состаноците, рече тој, најмногу зборувале за проекти.
„Во тоа тело, по функција, членуваа градоначалниците. Имаше повеќе оперативен дел во делот на организирање на проектите од изборните програми за кои ја добивме довербата од граѓаните. За протестите сме дискутирале меѓу себе, но забелешки или препораки не сме носеле“,
рече Трајковски.
Од судот тој доби прашања и за комуникацијата со Никола Груевски, кој исто така беше опфатен во истрагата за организацијата на „27 април“, но не беше поднесено обвинение бидејќи е недостапен за органите на прогонот. На тоа, Трајковски одговараше дека додека бил на функција имал само 2-3 средби и исто толку пати разговори со Груевски.
Трајковски е еден од ретките кому Русковска му постави прашање, додека во неколку наврати на денешното рочиште коментираше дека сите сведоци се повикани за исти околности, а ја обвини одбраната и дека ги злоупотребува своите права.
„Немам прашања, цело време е истото“,
рече Русковска кога имаше можност да поставува прашања на актуелниот пратеник и потпретседател на ВМРО-ДПМНЕ, Владо Мисајловски, кој беше еден од сведоците.
Мисајловски во тој период беше министер за транспорт и врски, но не бил член на ниедно партиско тело, а во одговорите рече дека не му е познато дека партијата, односно општинскиот комитет на Ѓорче Петров учествувал во организацијата на протестите ниту, пак, имал комуникација со обвинетите.
„Колку што знам јас, секој си одлучуваше дали ќе го поддржи собирот ‘За заедничка Македонија’ или не“,
рече Мисајловски.
Претходно, обвинителката приговараше дека се повикуваат сведоци и се зборуваат само истите работи и откако денеска сведочеа три членки на ВМРО-ДПМНЕ, кои во тој период биле дел од раководството на Унијата на жени на ВМРО-ДПМНЕ.
„Немам против одбраната да предлага сведоци, ама ова веќе е претерување, злоупотреба на правото на одбрана. Од утрово веќе имаме тројца сведоци од Унијата на жени. Тројца за една иста околност”,
реагираше Русковска.
Одбраната, пак, возврати дека ги викаат сите релевантни партиски функционери зашто обвинението е општо.
„Се работи за исти околности, но за различни функции, овие сведоци се од различни месни комитети. Со оглед дека имаме општо обвинение во кое не се наведува на кои општински и месни комитети влијаел мојот обвинет одбраната беше принудена да ги повика сите релевантни лица кои извршувале битни функции, а со цел расчистување на околностите битни за нас“,
рече адвокатот на Ристовски, Гоце Ристовски.
Обвинети во случајот за организација на 27 април се поранешниот претседател на Собранието Трајко Вељаноски, ексминистрите Миле Јанакиески и Спиро Ристовски и поранешниот директор на Управата за безбедност и контраразузнавање (УБК), Владимир Атанасовски. Тие седат на обвинителна клупа за делото терористичко загрозување на уставниот поредок и безбедноста.