Ексградоначалникот на Ѓорче Петров од ВМРО-ДПМНЕ, Сокол Митровски, е еден од тројцата поранешни градоначалници на скопските општини, заедно со Ивица Коневски – Аеродром и Тони Трајковски – Гази Баба, кои денеска дојдоа во Основниот кривичен суд во Скопје да сведочат во предметот за организацијата на настаните од 27 април 2017 во Собранието, по предлог на одбраната на обвинетите поранешни функционери.
Тој рече дека во тој период кога се одржуваа протестите не комуницирал со двајцата поранешни министри што седат на обвинителна клупа, Спиро Ристовски и Миле Јанакиески.
„Никогаш не сум комуницирал, не биле на таа функција за која би ми требале мене како градоначалник. Со Спиро сме комуницирале претходно кога беше министер за образование. Ниту сме комуницирале за протестите ниту, пак, локалната самоуправа имала некакви надлежности во врска со нив“,
рече Митровски.
Тој негираше и дека било барано од него да ги упатува граѓаните на протестите. Сличен одговор даде и за вработените во Општината.
„Никогаш тоа не било споменато да ги упатувам граѓаните на протестот. Тоа беше нивна граѓанска одлука, нивно право. Кој сакал, учествувал. Јас како градоначалник никогаш не сум учествувал“,
сведочеше ексградоначалникот на Ѓорче Петров.
Во текот на рочиштето треба да бидат сослушани и Коневски и Трајковски, а во судот ред за сведочење чека и потпретседателот на ВМРО-ДПМНЕ, Владо Мисајловски.
Досега сведочеа и поранешните пратенички Светлана Карапетрова и Светлана Јакимовска, кои тогаш биле дел од раководството на Унијата на жени на ВМРО-ДПМНЕ. И тие, како што досега можеше да се слушне од многу сведоци, одговараа дека партијата и Унијата немале одлука во врска со протестите „За заедничка Македонија“ ниту, пак, имало партиски инструкции од Јанакиески и Ристовски во врска со протестите. По нив, сведочеше уште една членка која била во раководството на Унијата на жени, а набргу следуваше и реакција на обвинителката Вилма Русковска.
„Немам против одбраната да предлага сведоци, ама ова веќе е претерување, ова е злоупотреба на правото на одбрана. Од утрово веќе имаме тројца сведоци од Унијата на жени. Тројца за една иста околност“,
реагираше Русковска.
Одбраната, пак, возврати дека ги вика сите релевантни партиски функционери зашто обвинението е општо.
„Се работи за исти околности, но за различни функции, овие сведоци се од различни месни комитети. Со оглед дека имаме општо обвинение, во кое не се наведува на кои општински и месни комитети влијаел мојот обвинет, одбраната беше принудена да ги повика сите релевантни лица што извршувале битни функции, а со цел расчистување на околностите кои се важни за нас“,
рече адвокатот на Ристовски, Гоце Ристовски.
Обвинети во случајот за организација на 27 април, покрај двајцата поранешни министри, се и поранешниот претседател на Собранието Трајко Вељаноски и поранешниот директор на Управата за безбедност и контраразузнавање (УБК), Владимир Атанасовски. Тие седат на обвинителна клупа за делото терористичко загрозување на уставниот поредок и безбедноста.