Поднесено е барање до компанијата „Телеграм“ со седиште во Лондон да се идентификуваат двајца администратори и двајца модератори на групата „Јавна соба“, а иствормено се прават криминалистички контроли на терен, изјави техничкиот министер за внатрешни работи Наќе Чулев во врска со случајот за групата во која се споделуваа експлицитни фотографии и видеа на девојчиња од земјава, меѓу кои има и малолетнички.
Полицијата спроведува криминалистичка контрола на терен и дадени се насоки до инспектори во сите СВР за на терен да се собираат информации за идентификување на лицата кои биле модератори и администратори на групата, но и за сите учесници во групата кои го прекршиле законот за производство и дистрибуција на детска порнографија и за злоупотреба на лични податоци.
„Сè уште немаме одговор од ‘Телеграм’. Сè уште не ни се познати администраторите. Се работи на оперативни активности на терен. Веќе имаме и многу релевантни сознанија за идентификување на дел од луѓето кои ја менаџирале оваа група, но во интерес на истрагата не би одел со конкретни имиња зашто се е во фаза на истрага“,
кажа Чулев.
По добивање на информацијата за „Јавна соба“ на „Телеграм“, посочи тој, било информирано Основното јавно обвинителство и истовремено биле собрани сите информации од групата за профилите.
„Се работи за околу осум илјади члена, чиј број опадна во последниот период. Се работи за околу 800 фотографии и видеа, претежно од Фејсбук, Инстаграм и интернет, но има и приватни фотографии и видеа“,
изјави Чулев.
Тој нагласи дека биле дадени насоки на инспектори да стапат во контакт и да погрижат за сите жртви и сите што ќе пријават дека им се злоупотребени лични податоци.
„Досега има два пријавени случаја, но колку што знаеме се работи за злоупотреба на лични податоци, но не и за член 193 за производство и дистрибуција на детска порнографија. Сè уште не е докажана, но ќе се оди во насока на инкриминирање на сторителите“,
изјави Чулев.
На прашањето дали се повикани некои од имињата посочени во медиумите дека членувале во групата „Јавна соба“, министерот Чулев рече дека колегите веќе работат. Учесниците во „Јавна соба“, кажа Чулев, користеле многу звучни имиња и сега полицијата врши идентификување дали се тоа навистина личностите за кои се зборува.
„Работат колегите. Пред сè ставаме инпут на оние членови кои објавиле компромитирачки материјали, но не и на учесниците. Осум илјади луѓе се. Не може сите членови да се повикаат, туку само оние што го прекршиле законот. Ќе се повикаат прво само оние членови што објавиле компромитирачки материјали“,
изјави Чулев.
Во однос на тоа дека веќе се формираат нови групи на други медиуми, Чулев кажа дека ги следат и другите групи што се формираат и дека ќе излезат со дополнителни информации ако има такво нешто.
Поврзани вести:
Бирото за јавна безбедност започна истрага за групата со малолетничка порнографија на Телеграм
МВР чека Телеграм да ја избрише групата со експлицитни фотографии од малолетнички