Дополнителната заменик-министерка во МВР, Славјанка Петровска, вчеравечер на својот Фејсбук-профил објави дека Бирото за јавна безбедност веднаш започнало истрага за мотивите и целите за формирање на затворената група на Телеграм, на која се споделуваат експлицитни фотографии од малолетнички.
Таа најави дека сите детали и наоди веднаш ќе бидат објавени во јавноста, а за прекршителите ќе следуваат пријави.
Вчера, Радио МОФ и А1.он објавија вознемирувачки стории дека на апликацијата Телеграм веќе еден месец постои затворена група позната како „Јавна соба“ со над 7.400 членови каде се споделуваат фотографии и видеа на малолетнички од земјава, некои со име и презиме.
Двата медиум и самите посведочиле за она што се случува меѓу членовите на оваа група, а од изјавите на нивните соговорници, меѓу кои и професорка од скопско средно училиште, заклучиле дека меѓу нив има и лажни профили чии идентитети не се познати. Порнографските материјали на девојчиња на 12, 13 години и малку повозрасни секој член може да ги зачува и понатаму да ги користи. И соговорниците и медиумите вчера побараа одговор од МВР.