Според направените анализи, кај малолетниците, кои се на возраст од 14 до 17 години, било регистрирано присуство на психотропни супстанции, но не било пронајдено дека користеле алкохол
Четворицата малолетници, кои вчера во тешка здравствена состојба и во бессознание беа хоспитализирани на Клиниката за токсикологија, денеска се во стабилна состојба, информира директорот на Клиниката Андон Чибишев во изјава за „360 степени“.
„Сите четири лица се во стабилна состојба, свесни се и контактибилни“,
вели Чибишев.
Тој додава дека според направените анализи кај малолетниците, кои се на возраст од 14 до 17 години, било регистрирано присуство на психотропни супстанции, но не било утврдено дека користеле алкохол.
„Лицата немаат посериозни повреди на главата или телото, а она со што беа вчера донесени е санирано“,
додава Чибишев.
Малолетниците, вели директорот на Токсикологија, ќе бидат задржани на Клиниката уште неколку дена и нивното лекување ќе продолжи.
Вчера четворицата – две момчиња и две девојчиња – беа однесени на Клиниката во бессознание, по што беа преземени мерки за нивна реанимација.
Две од лицата за кратко беа стабилизирани, а другите две во потешка состојба беа препратени на дополнителни испитувања и на рендген затоа што имале повреди по телото.
Случајот вчера го потврдија и од Министерството за внатрешни работи (МВР) од каде што информираа дека во полицијата било пријавено нарушување на јавниот ред и мир, а четворицата малолетници биле пронајдени во куќа на лице со иницијали Д.Г. (40).
Од МВР рекоа дека во координација со јавен обвинител се преземаат мерки за расчистување на случајот.