Софија ја цени брзата реакција на Скопје против провокациите. Оваа порака била испратена откако денеска во бугарското Министерството за надворешни работи (МНР) на разговор бил поканет вршителот на должност амбасадор на Република Северна Македонија во Бугарија, јавува БГНЕС.
На состанокот во бугарското МНР, пишува медиумот, бугарската страна нагласила дека ги цени брзите реакции на властите во Скопје во врска со случајот на палење на бугарското знаме и пројавите на говор на омраза на социјалните медиуми против членови на бугарската Влада.
Реакциите за кои во веста се вели дека Софија ги цени се случија минатата недела.
На 18 ноември Владата информираше дека на иницијатива на премиерот Зоран Заев и министерот за надворешни работи Бујар Османи ќе биде разрешен Зоран Иванов од функцијата претседател и член на Надзорниот одбор на Медиумската информативна агенција (МИА) поради недолична комуникација и ширење на говор на омраза кон претставници на бугарската влада.
Брза реакција и осуда МНР имаше и за видео кое се појави на социјалните мрежи на кое беше прикажано палење на знамето на Бугарија, оценувајќи дека тоа било евтин и неуспешен обид да се предизвика омраза помеѓу граѓаните на двете држави.