Без оглед на нашиот билатерален дијалог со Република Северна Македонија, Бугарија инсистира на тоа спроведувањето на Договорот за добрососедство од страна на Република Северна Македонија да биде вклучено меѓу условите во идната рамка за преговори за пристапување на Скопје во ЕУ, изјави заменик-министерот за надворешни работи на Бугарија, Румен Александров
Министерството за надворешни работи на Бугарија информира дека денеска го потврдиле својот став за европската перспектива на С Македонија на денешниот редовен состанок на Советот за општи работи во Луксембург, притоа останувајќи отворени за конструктивен дијалог со претстојното словенечко претседателство со Советот на ЕУ за изнаоѓање заемно прифатливи решенија.
Бугарија на состанокот на Советот беше застапувана од заменик-министерот за надворешни работи на земјата Румен Александров и за време на разговорите се дискутираше за моменталната состојба во процесот на проширување на ЕУ.
„Бугарија ги продолжува консултациите со Скопје во спроведувањето на Договорот за пријателство и добрососедство. Приоѓаме конструктивно и со добра волја, но очекуваме Република Северна Македонија да започне во пракса да ги спроведува преземените обврски на високо ниво од 17 јуни 2021 година во Софија, што ќе ни овозможи да се движиме во позитивна насока“,
рече Румен Александров.
Според соопштението на бугарското МНР, ова вклучува експлицитно откажување на С Македонија од територијални, малцински и историски претензии кон Бугарија, промена на натписи / споменици кои создаваат омраза кон Бугарија, активирање на процес на рехабилитација на жртвите на Југославенскиот комунизам поради бугарска самосвест.
„Без оглед на нашиот билатерален дијалог со Република Северна Македонија, Бугарија инсистира на тоа спроведувањето на Договорот за добрососедство од страна на Република Северна Македонија да биде вклучено меѓу условите во идната рамка за преговори за пристапување на Скопје во ЕУ“,
изјави Александров.
Бугарија ги пофали достигнувањата на Албанија во реформскиот процес и ја потврди својата поддршка за усвојување на рамката за преговори за оваа балканска земја.