Во текот на следните денови се очекува да бидат отстапени уште две возила од Армијата кои ќе се користат за другите градови
Пет болнички возила на Армијата на РСМ од денеска ѝ се ставени на располагање на Брзата помош со цел да се зголеми капацитетот за транспорт на пациентите болни од ковид-19 до болниците. Во текот на следните денови се очекува да бидат отстапени уште две возила од Армијата кои ќе се користат за другите градови.
Министерот за здравство Венко Филипче вели дека помошта е повеќе од потребна во ситуација кога здравствениот систем е под голем притисок и е неопходен брз транспорт.
„Оваа помош ќе го зголеми бројот на тимови кои ќе бидат на располагање за транспорт на пациенти. Здравствениот систем веќе неколку дена по ред е под огромен притисок. Ситуацијата е критична. Утринава имавме координативен состанок со директорите на интерните клиники и договаравме распоред на пациенти и дополнителни болнички капацитети. Формиран е дополнителен тим, којшто е одговорен за третманот на пациентите на интерните клиники“,
истакна Филипче.
Министерката за одбрана Радмила Шекеринска рече дека во овие моменти, кога земјата се соочува со пандемијата, потребно е сите да бидат одговорни и да се најде начин за да се помогне.
„Тоа се возила кои даваат можност за транспорт на повеќе лица. Ги даваме како поддршка затоа што сега сите ресурси на државата треба да ги насочиме тука“,
нагласи Шекеринска.