Лицата во домашен карантин ќе гласаат на 13 јули, додека за гласање следниот ден се пријавиле 9 020 немоќни лица и хронично болни
Вкупно 697 болни од ковид-19 и лица во самоизолација се пријавиле во ДИК за гласање на парламентарните избори следната седмица.
За гласање, до истекот на рокот на полноќ, се пријавиле и 9 020 немоќни лица и хронично болни.
Лицата што се во домашен карантин поради позитивен тест на ковид-19 и лицата на кои им е одредена самоизолација со решение од Државен санитарен и здравствен инспекторат ќе гласаат на 13 јули во нивните домови.
Лицата чии резултати ќе бидат позитивни после 8 јули или ќе бидат ставени во самоизолација по овој датум, нема да може да се пријават за гласање.
Немоќните и хронично болните ќе гласаат на 14 јули.
Сѐ уште трае пријавувањето за гласање на лицата во домашен притвор. Рокот за тоа завршува на 11 јули.
На изборниот ден, на 15 јули, избирачките места ќе бидат отворени во 7 часот, а гласањето ќе трае до 21 часот, два часа подолго од вообичаеното на претходните избори кога гласачките места се затвораа во 19 часот.
До 6 јули напладне, за гласање беа пријавени само 19 лица со ковид-19 и 1 129 болни и немоќни лица, но, според последните информации, во наредните три дена нагло пораснала бројката на заинтересирани за учество на изборите.