Гогов рече дека до крајот на годината треба да пристигнат две нови амбулантни возила од Министерството за здравство, со што болницата ќе ги има сите услови за превоз на пациенти
Откако директорот на струмичката болница преку Фејсбук алармираше дека имаат потреба од амбулантно возило за транспорт на ковид пациенти и побара донации, денеска болницата доби санитетско возило од Дирекцијата за заштита и спасување, кое досега го користеше Центарот за јавно здравје во Струмица.
„Со превозот на пациенти се најдовме во многу тешка состојба заради застарениот возен парк. Имавме само две возила, од кои едното го користевме за транспорт на други пациенти, а второто за болни од коронавирусот. Ова возило ја има сета потребна опрема за превоз на пациенти и многу ќе ни помогне во овој период“,
рече директорот Гогов.
Гогов рече дека до крајот на годината треба да пристигнат две нови амбулантни возила од Министерството за здравство, со што болницата ќе ги има сите услови за превоз на пациенти.
Претходно, директорот на болницата на Фејсбук посочи дека располагаат со мал број болнички возила што постојано се користат и кои се застарени и често се расипуваат. Затоа, тој ги повика своите сограѓани да донираат за набавка на ново болничко возиоло. Неколку часа подоцна, се премисли и го повлече статусот, а како причина ги наведе негативните коментари на социјалните мрежи.
По втората објава на Гогов, се јави пратеникот на СДСМ од Струмица Костадин Костадинов, посочувајќи дека веќа е набавено ново возило, што ќе стигне за околу два месеци.