Министерот за транспорт и врски, Благој Бочварски, вели дека не би сакал да прејудицира што ќе се случи ако Законот за изградба на коридорите 8 и 10 „падне“ на Уставен суд, иако претходно тој кажа дека Владата има разработено варијанти во однос на отпочнување и изградба на коридорите.
„Би сакал да потенцирам дека ние сме демократска држава, демократско општество, каде што секоја институција треба да води грижа за постапките, во однос на Уставот и на законите. Собранието носи закони. Во однос на некаков коректор на Собранието е Уставниот суд. Затоа реков дека секој има право да носи одлуки согласно тоа што го додедиле Уставот и законите како право и обврска на секоја институција. Владата има свои обврски, Собранието е над Владата. Тоа донело закон, ја делегира Владата да продолжи одредена постапка, но, секако ние сме демократска држава и секој може да постапи така како што смета и не би сакал да прејудицирам што би се случило, ако се случи некаква постапка“,
изјави Бочварски во гостување на емисијата „Жешко политичко лето“ на ТВ Канал 5.
Министерот посочи дека Владата ќе формира работна група со меѓународни експерти и консултантски куќи, кои ќе треба да започнат постапка за преговори за изградба на автопатите. Повтори дека се дава простор истата компанија да изведува и гради за, како што рече, да не се случуваат потоа судири во однос на изведувач и проектант, со што штета повторно би трпеле граѓаните. Бочварски тврди дека стручни лица, инженери, супервизори, надзорни органи, со потпис и печат ќе ја гарантираат изградбата.
Антикорупциската комисија најави дека в понеделник Законот ќе го оспори пред Уставниот суд, откако тој експресно го помина собранискиот филтер и доби зелено светло од шефот на државата.
Специјалниот закон е резултат на претходно потпишаниот Меморандум за соработка на Владата со американско-турскиот конзорциум „Бехтел и Енка“ – чин на кој присуствуваа и претставници на амбасадата.