Американската амбасада ја поддржува Антикорупциската комисија, но не ги коментира нејзините наводи дека специјалниот закон за изградба на автопати без тендер претставува сериозен фактор ризик за корупција, објави Алсат Телевизија.
„Ова е внатрешно прашање кое треба да го разгледа Владата на Северна Македонија. Ние силно ја поддржуваме работата на Антикорупциската комисија и нејзината важна надзорна улога“,
велат од амбасадата на САД во Скопје.
Законот за кој Антикорупциска алармира, експресно го помина собранискиот филтер и доби зелено светло од шефот на државата. Тој е резултат на претходно потпишаниот Меморандум за соработка на Владата со американско-турскиот конзорциум „Бехтел и Енка“ каде дојдоа и претставници на амбасадата.
Антикорупциската комисија смета дека со специјалниот закон се повредени уставните начела за еднаквост и слобода на пазарот. Антикорупционерите најавија оспорување на овој закон пред Уставниот суд откако шефот на државата, Стево Пендаровски, го потпиша указот за негово прогласување.