Од почетокот на октомври на репертоарот, согласно новите правила за заштита од пандемијата, имаше само по една монодрама и дуодрама. Актерите вклучени во овие претстави не се меѓу заболените со ковид-19
Театарот во Битола ги одложи сите претстави и прекина со работа откако се појавија првите случаи на ковид-19 меѓу вработените.
Станува збор за четворица вработени– актери, уметнички и технички персонал, а денеска се чекаат резултати за уште еден актер.
Меѓу заболените со ковид-19 е и директорот на театарот, Иван Јерчиќ, кој во изјава за „360 степени“ вели дека засега и тој и останатиот персонал се во добра здравствена состојба.
Јерчиќ верува дека вирусот е донесен однадвор бидејќи, како што вели, на пробите и подготовките за новите претстави се почитувале сите протоколи за заштита од ковид-19. Поради тоа, вели, освен заболените, нема дополнителен персонал од театарот, кој е испратен во изолација.
„Поради отсуство на главниот глумец во новата претстава, неколку дена не ни работевме и екипата не беше загрозена, значи вирусот дојде однадвор. Последната голема проба ја имавме пред десет дена, на 17 октомври, и немаше никаков физички контакт, беше читачка проба. Поради тоа, нема ставено никој во изолација, бидејќи воопшто не бевме во контакт и навреме ги прекинавме пробите“,
вели Јерчиќ за „360 Степени“.
Театарот во Битола, по седум месеци пауза поради забраната за работа, ја одигра првата претстава на почетокот на октомври, а на репертоарот, согласно новите правила за заштита од ковид-19, имаше само по една монодрама и дуодрама. Ниту еден од актерите вклучени во овие претстави не е заболен од ковид-19.
Јерчиќ очекува доколку нема нови случаи на ковид-19, театарот да почне со работа кон средина на ноември.