Владата ќе направи максимални напори да ги поддржи вработените и компаниите од угостителството и туризмот за да зачува колку што е можно повеќе работни места за граѓаните, вети вицепремиерот за економски прашања, Фатмир Битиќи на денешната средба со претставниците на Независната угостителска комора (НУК).
Битиќи информира дека четвртиот сет економски мерки интензивно се подготвува, ќе биде сеопфатен и ќе им пружи вистинска поддршка токму на оние кои имаат потреба.
„Компаниите од угостителството и туризмот се јавуваат во најголем број како апликанти за бескаматните кредити што се доделуваат преку Развојната банка, а со кои се одржа ликвидноста на компаниите, голем број компании од овие сектори ја искористија и можноста да аплицираат и да ја добијат поддршката за исплата на минималната плата за своите вработени, со што се зачуваа огромен број на работни места, додека преку ваучерите за купување домашни производи и за домашен туризам, дополнително се раздвижија и угостителствот и туризмот“,
рече Битиќи на средбата со претставниците на НУК.
Угостителите и туристичките работници во неколку наврати бараа продолжување на економската помош од државата за надминување на кризата. Туристичките работници најавија дека ќе организираат и нови протести, доколку Владата не им излезе во пресрет и не ги исполни нивните барања.