„Ако аргументите и бројките се на ваша страна, тогаш утре изнесете ги таму каде што се носат одлуките за парите на граѓаните, во Собранието. Знам дека не ви е навика често да ги браните економските политики пред пратениците. Но кога се бараат стотици милиони евра и кога буџетската недисциплина на Владата треба да се претстави како нормална политика, тогаш не се испраќа покана за кафе во Министерството за финансии. Тогаш се доаѓа во Собрание и се одговара пред оние што имаат уставна обврска да вршат контрола над вашата работа“, вели пратеникот на СДСМ во објава на Фејсбук, откако министерката за финансии во саботата го повика економскиот тим на опозициската партија на заедничка средба во Министерството
Пратеникот на опозицискиот Социјалдемократскиот сојуз на Македонија (СДСМ) и поранешен вицепремиер за економски прашања, Фатмир Битиќи ја повика министерката за финансии, Гордана Димитриеска-Кочоска утре да дојде во Собранието и пред пратениците да ги брани и аргументира економските политики на Владата поврзани со задолжувањето од 260 милиони евра и новата Фискална стратегија 2027-2031 г.
Станува збор за продолжение на преписката меѓу опозициската партија и министерката за финансии од викендот, која дојде по обвинувањата од лидерот на СДСМ, Венко Филипче дека буџетот е пред колапс и нема пари за повисоки плати, пензии и антикризни мерки. На наводите на Филипче, преку објава на Фејсбук одговори Димитриеска-Кочоска која го покани економскиот тим на социјалдемократите во Министерството за финансии за да се, разјаснат, како што напиша, економските состојби со реални бројки, наспроти „хистеричните прес-конференции полни со невистини“.
„Почитувана министерке за финансии, Гордана Димитриеска-Кочоска утре ќе дојдете во Собрание или ќе напишете нов статус на Фејсбук за „аргументирање“ на задолжувањето од 260 милиони евра и новата Фискална стратегија 2027-2031?“,
напиша денеска Битиќи на социјалната мрежа.
Тој најави дека доколку министерката одговори на поканата, во Собранието ќе ја чека и едно, како што вели, дополнително прашање, на кое ќе треба да даде одговор.
„За да ве охрабрам и мотивирам, ќе бидам транспарентен однапред, ќе ве пречека и едно дополнително прашање на кое ќе треба да дадете одговор: ‘Дали со вашата објава на Фејсбук веќе ја најавивте следната должничка епизода од околу 350 милиони евра за остатокот од еврообврзницата што треба да се сервисира во јуни?“,
вели пратеникот.
Според него, одлуките за парите на граѓаните треба да се споделуваат во Собранието, а не со испраќање покана за кафе во Минстерството за финансии преку Фејсбук, кој како што наведува пратеникот, е удобен за комуникација оти нема реплики, процедирални забелешки, и нема непријатни бројки и аргументи.
„Ако аргументите и бројките се на ваша страна, тогаш утре изнесете ги таму каде што се носат одлуките за парите на граѓаните, во Собранието. Знам дека не ви е навика често да ги браните економските политики пред пратениците. Но кога се бараат стотици милиони евра и кога буџетската недисциплина на Владата треба да се претстави како нормална политика, тогаш не се испраќа покана за кафе во Министерството за финансии. Тогаш се доаѓа во Собрание и се одговара пред оние што имаат уставна обврска да вршат контрола над вашата работа. Фејсбук е удобен, нема реплики, нема процедурални забелешки, нема непријатни бројки и аргументи, но граѓаните не ги избраа пратениците за да читаат ваши статуси на социјалните мрежи, туку за да бараат одговори во нивно име“,
напиша пратеникот и поранешен вицепремиер за економски прашања на социјалната мрежа.
За потсетување, министерката за финансии во саботата преку објава на Фејсбук упати покана до економскиот тим на опозицискиот СДСМ да дојде на заедничка средба во Министерството за финансии за да ги разјаснат економските со реални бројки, бидејќи според неа опозицијата изнесува погрешни толкувања и шири паника во јавноста, иако официјалните економски показатели покажуваат стабилност и раст.
Повод за нејзината објава и покана беше прес-конферецијата на лидерот на СДСМ, Венко Филипче, кој од Бихакќа обвини состојбата во економијата ја оцени како сериозни влошена и ја обвини Владата предводена од Хритијан Мицкоски дека не успеала да обезбеди подобар животен стандард за граѓаните. Според него, буџетот е пред колапс и нема пари за повисоки плати, пензии и антикризни мерки.
Инаку, Филипче одговори на поканата на министерката за финансии, пишувајќи на платформата Икс дека ја прифаќаат, но побараа дискусијата да биде транспаретна и да се одвива пред камери.
„Добро. Доаѓаме. Но, да дојдат и медиумите со камери. Отворете ги вратите широко, нека случаат и нека гледаат граѓаните. Нека ни објасни како 1+2=5, како што објаснуваше дека половина Европа ќе банкротира, а Македонија ќе стане богата“,
напиша Филипле на Икс, доцна вечерта во саботата.