Во однос на испораката на топлинска енергија во системот за централно греење во Скопје, како што кажа претседателот на РКЕ, загрижува тоа што ТЕ-ТО во мрежата испорачува помалку од она што е предвидено. Во контекст на ова прашање тој посочи дека топловодот под мостот „Беласица“, кој лани беше оштетен во пожар, нема влијание на работата на когенеративната централа ТЕ-ТО
Во ниту еден случај нема да дојде до поскапување на цената на топлинската енергија за домаќинствата, изјави денеска на прес-конференција претседателот на Регулаторната комисија за енергетика (РКЕ), Марко Бислимоски, додавајќи дека единствено што е можно таа се намали, што ќе зависи од тоа дали ќе биде субвенционирана или не.
Првиот човек на РКЕ порача дека Комисијата ќе ги преземе сите механизми за да имаме стабилна ситуација со цената на топлинската енергија имајќи ги предвид, како што додаде, цените на природниот гас на берзите во Европа.
„Во текот на јули вообичаено ние ќе ја донесеме таа одлука. Можевме и сега да носиме популистичка одлука, кога ја намаливме цената за недомаќинствата, но се решивме да им се помогне пред сè на овие потрошувачи кои во текот на енергетската криза ниту еднаш не беа субвенционирани“,
рече Бислимоски одговарајќи на новинарско прашање на денешната прес-конференција.
Имено, тој потсети на неодамнешната одлука на РКЕ за 35 отсто да ја намали цената на парното за фирмите, основните училишта, градинките и малите дуќани кои се приклучени на системот за топлинска енергија во градот Скопје.
Во наредниот период, рече Бислимоски, ќе ја следат цената на природниот гас и ќе видат како таа ќе се одрази на одлуките што РКЕ ќе го носи понатаму.
Во однос на испораката на топлинска енергија во системот за централно греење во Скопје, како што кажа претседателот на РКЕ, загрижува тоа што ТЕ-ТО во мрежата испорачува помалку од она што е предвидено.
„Загрижува фактот што ТЕ-ТО дава нешто помалку од тоа што сме го предвиделе да го дава во мрежата, но понатака како ќе проаѓа времето ќе анализираме, ќе имаме состаноци со ТЕ-ТО и со ‘ЕСМ дистрибуција на топлинска енергија’ да видиме што било причината за тоа“,
рече Бислимоски.
Во контекст на ова прашање тој посочи дека топловодот под мостот „Беласица“, кој лани беше оштетен во пожар, нема влијание на работата на когенеративната централа ТЕ-ТО.
„Мислевме дека има, ама сега нема влијание, но ќе видиме зошто ТЕ-ТО од средината на декември, па некаде до 10 јануари не произведувал ни електрична енергија, а со тоа ни топлинска енергија бидејќи цената на природниот гас била таква што цената на електричната енергија не ги покрива трошоците за работа“,
рече Бислимоски посочувајќи дека ТЕ-ТО дава топлинска енергија кога му дозволуваат пазарните услови.
Тој прецизира дека е предвидено ТЕ-ТО да два околу 60 проценти од топлинската енергија, а во системот испрачувал под 50 проценти.
Тој појасни дека не можат да бараат од ТЕ-ТО, како нерегулиран производител на електрична и на топлинска енергија, да испорачува нешто што би го носело во големи загуби.
„Ние не можеме до крај да бараме од ТЕ-ТО да произведува повеќе топлинска енергија, а помалку електрична енергија кога јасно е дека најголемите добивки ТЕ-ТО си ги прави на слободниот пазар на електрична енергија од продажба на електрична енергија“,
рече Бислимоски, пренесува МИА.
Во врска со приклучувањето на ТЕЦ „Неготино“ кон АД ЕСМ (Електрани на Северна Македонија) , според првиот човек на Регулаторна е исправена грешка која според него била направена при преструктуирањето на вертикално интегрираното претпријатие „Електростопанство на Македонија“ (ЕСМ) во 2004 година.
„Сите производни капацитети на тогашната ЕСМ припаднаа во новоформираната компанија ЕЛЕМ, единствено остана ТЕЦ ‘Неготино’ надвор од целта приказна. Тоа најверојатно тогаш е направено за ТЕЦ ‘Неготино’ бидејќи беше предмет на продажба, имаше еден обид во 2006, имаше еден обид и во 2008 година. Сега вака е многу поправилно затоа што сите производни единици се внатре во рамките на ЕЛЕМ, така што ова е во насока на зголемување на ефикасноста на работењето на АД ЕСМ, особено на ТЕЦ ‘Неготино’ затоа што иако тоа не е драматичен трошок сега повеќе ќе нема управен одбор, ќе нема надзорен одбор. Исто така, и одредени други трошоци коишто биле поврзани со самото работење на ТЕЦ ‘Неготино’ ќе ги нема“,
рече Бислимоски прашан за коментар дали приклучувањето на ТЕЦ „Неготино“ е за да се зголеми продажната цена на ЕСМ.
Според претседателот на Регулаторната комисија за енергетика, нема пазарна логика да се приватизираат „Електрани на Северна Македонија“.
„Не верувам дека воопшто некој странски инвеститор би бил заинтересиран да го купи ТЕЦ ‘Неготино’ или термоелектраната во Битола во услови кога трошоците за производство на електрична енергија се високи и имаме цени коишто се повисоки од пазарните. Не верувам дека некој странски инвеститор би сакал да купи термоелектрани коишто се при крај на животниот тек или, пак, термоелектрана на мазут која очигледно во изминативе 40 години работела најмногу една година во тој цел изминат период. Така што, нема пазарна логика да се случи тоа“,
вели Бислимоски.