Тие сега велат да влезат Бугарите во Уставот. Некој ќе рече зошто да не, но јас ви гарантирам дека ако тоа се случи, за шест месеци ќе има ново барање. Ако се реализира и тоа барање за шест месеци, веќе за 12 месеци ќе има трето, вели потпретседателот на ВМРО ДПМНЕ во емисијата „360 степени“ на ТВ Алсат
Македонија се доведе во сериозно подредена позиција поради немањето национална стратегија. Сметам дека треба да се изгради сериозна национална стратегија за односите со Бугарија. Затоа континуирано Македонија губи. Доколку имаме јасна стратегија, ќе можеме и јасно да ги поставиме нашите позиции од кои мислам дека не смееме да се поместиме ниту милиметар, изјави потпретседателот на ВМРО-ДПМНЕ, Александар Николоски, во своето гостување во емисијата „360 степени“ на ТВ Алсат, зборувајќи за отворените прашања со Бугарија и бугарското вето во ЕУ.
За барањето на Бугарија за впишување на Бугарите во Уставот, Николоски смета дека со тоа нема да се реши проблемот, бидејќи, според него, потоа Бугарија ќе продолжи да поставува нови услови.
„Тие сега велат да влезат Бугарите во Уставот. Некој ќе рече зошто да не, но јас ви гарантирам дека ако тоа се случи, за шест месеци ќе има ново барање. Ако се реализира и тоа барање за шест месеци, веќе за 12 месеци ќе има трето. Таму има јасен концепт и јасна стратегија којашто, гледате, и во модерно време не се менува. Владите се менуваат во Бугарија, стратегијата останува. Дури се толку цврсти околу тоа што ако некој малку избега го враќаат на колосекот. Еве, јавно на Петков му кажаа – ако ја промениш политиката кон Македонија, нема да си премиер. Во такви услови, ние треба да сме наивни да веруваме дека во Бугарија нешто ќе се смени или да мислиме дека ако направиме чекор, со него ќе се реши проблемот“,
изјави Николоски.
Потпретседателот на ВМРО-ДПМНЕ тврди дека е потребно нашата Влада да бара цврсти гаранции од Бугарија дека тие нема да имаат нови барања од Македонија во иднина, а најголем проблем и разлика меѓу нашата држава и Бугарија е тоа што ние, како што оценува Николоски, немаме контратактика, ниту цврсти ставови како Бугарија.
„Еден од начините да се реши проблемот е да се добијат цврсти гаранции, не само писмено туку и со одлука на бугарското Народно собрание дека веќе нема да има барања во однос на Македонија. Ние се додека не видиме гаранции од Бугарија, не смееме да направиме ниту еден чекор. Обидот да се одоброволи некој, само ќе води кон национална катастрофа и само ќе води кон парче по парче решавање на проблемот ,според нив, а според нас – создавање на проблемот“,
смета Николоски.
Тој посочи и дека во Бугарија постои редовна комуникација меѓу власта и опозицијата, како и со претседателот Румен Радев за да ги потврдат своите ставови, а кај нас тоа не е случај.
„Никој не го информира ВМРО-ДПМНЕ за тоа што се случува во преговорите со Бугарија. Таму ситуацијата е поинаква, на отворањето на контроверзниот клуб во Битола заедно дојдоа бугарски претставници од власта и опозицијата. Тие редовно се среќаваат кај бугарскиот претседател Радел, кој си ја врши работата и се брифираат и си градат заеднички позиции, што не е случај кај нас“,
нагласи Николоски.
*Повеќе вести од гостувањето на Николоски во „360 степени“: