Во однос на цената за струјата на домаќинствата, министерот нагласи дека се прават напори да нема нејзино драстично зголемување. Сепак, кажа дека граѓаните што трошат помалку ќе плаќаат помалку и обратно, оние што, како што рече, трошат непотребно и имаат простор да трошат, ќе плаќаат повеќе
Сигурно е дека ќе има намалување на цената на електричната енергија за малите потрошувачи на регулираниот пазар, изјави денеска министерот за економија Крешник Бектеши, кој нагласи дека намалувањето на цената би се базирало на веќе стабилизираните цени на електричната енергија и на природниот гас на светските берзи.
„Веќе се обезбедени средства за тоа, а вчера помина и акцискиот план со поддршка на Европската Унија. Очекуваме кон средината на јануари да ги добиеме и средствата од ЕУ со кои ќе можеме директно да ги помогнеме микро и малите компании. Тоа дозволува ние да можеме да интервенираме за да бидат поконкурентни нашите микро и мали компании не само на нашиот пазар туку и во регионот и пошироко“,
рече Бектеши во одговор на прашање пред почетокот на одбележувањето на јубилејот 90 години од основањето на Занаетчиската комора-Скопје.
Во однос на цената за струјата на домаќинствата, министерот нагласи дека се прават напори да нема нејзино драстично зголемување. Сепак, кажа дека граѓаните што трошат помалку ќе плаќаат помалку и обратно, оние што, како што рече, трошат непотребно и имаат простор да трошат, ќе плаќаат повеќе и такви ќе бидат и цените.
Конечната одлука за цената на електричната енергија на регулираниот пазар по 1 јануари, како што нагласи Бектеши, е во рацете на Регулаторната комисија за енергетика (РКЕ) која во моментов ги прави пресметките.