Според него, главна цел на оваа мерка за која, како што рече, и изминатите години имало голем интерес, е да им се овозможи на лицата со ниски приходи да искористат годишен одмор и во исто време да им се помогне на туристичките центри во зголемување на обемот на работа надвор од туристичка сезона
Ќе бидат доделени 3 555 ваучери во вредност од по 18 000 денари за одмор во домашни туристички капацитети за работници чии месечни примања во семејството не го надминуваат нето приходот од 50 000 денари. Ова денеска на прес-конференција го соопшти министерот за економија Крешник Бектеши, кој додаде дека јавниот повик ќе биде објавен в понеделник на 12 февруари, како и дека за оваа мерка, согласно Програмата за поддршка на домашен туризам за работници со ниски приходи, се обезбедени средства во износ од 64 милиони денари.
„Потврдата за одмор на работниците со ниски приходи ќе може да се искористи надвор од туристичката сезона во некој од угостителските објекти од Листата на пријавени угостителски објекти за сместување, објавена на веб-страницата на Министерството за економија. Потврдата ќе може да се искористи од моментот на добивање до 30 јуни 2024 година и од 15 септември до 1 декември 2024 година“,
вели министерот.
Според него, главна цел на оваа мерка за која, како што рече, и изминатите години имало голем интерес е да им се овозможи на лицата со ниски приходи да искористат годишен одмор, и во исто време да им се помогне на туристичките центри во зголемување на обемот на работа надвор од туристичка сезона.
„Оваа мерка во минатото даде видливи резултати. Бројот на домашни туристи во континуитет се зголемува во последните години, а бројот на ноќевања веќе и го надмина бројот на странски туристи. Денеска е краен рок за аплицирање за хотелите кои сакаат да примаат гости со ваучери за одмор. Тие што не аплицирале досега можат тоа да го направат преку пошта или во Архивата на Министерството за економија“,
рече Бектеши.
За учество на јавниот повик, граѓаните кои ги исполнуваат условите треба да достават потврда од работодавецот за висината на исплатена плата и извод од банка за последните три месеци за подносителот и на членовите на потесното семејство, потврда од Агенцијата за вработување со која се докажува дека членовите на потесното семејство не се вработени, за членовите од семејството кои се над 18 години и се средношколци или студенти се доставува потврда од образовната установа. Покрај тоа барателот треба да достави и фотокопија од лична карта и извод од матична книга за него и семејството, доказ за членовите на потесното семејство (Извод од матичната книга на венчаните, потврда за развод или посмртница за член од семејството), изјава дека барателот морално, материјално и кривично одговара за внесените податоци заверена на нотар.
Бектеши рече дека барањата со комплетна документација може да се достават до Архивата на Министерството за економија, на ул. „Јуриј Гагарин“15, Скопје најдоцна до 29 февруари 2024 година.