За овие стотина компании и јавни комунални претпријатија ги информиравме Управата за јавни приходи и Финансовата полиција и очекувам дека и двете институции ќе постапат согласно законите, вели министерот за економија
Универзалниот снабдувач со електрична енергија „ЕВН хоум“ има обврска, согласно одлука од страна на Владата, од 1 декември да ги исклучи од регулиран пазар оние компании и јавни комунални претпријатија кои го прекршиле Законот за енергетика и бесправно се префрлиле од отворен на регулиран пазар на електрична енергија, вели министерот за економија Крешник Бектеши.
„Во меѓувреме, за овие стотина компании и јавни комунални претпријатија ги информиравме Управата за јавни приходи и Финансовата полиција и очекувам дека и двете институции ќе постапат согласно законите“,
додава Бектеши.
Според него во Законот за енергетика не е наведено децидно дека подружница отворена од комапнија не може да ја преземе одговорноста во делот на плаќање на фактури за електрична енергија.
„Но, во делот на плаќање на ДДВ мислам дека има злоупотреба и за ова се знае кои се одговорни инстутуции и кои треба да ги направат соодветните контроли. На регулираниот пазар имаме стапка на ДДВ од 5 отсто, а во слободниот пазар е друга и за тој основ треба да се направат соодветните контроли и да се преземат мерки“,
нагласи министерот Бектеши.
Делот во разликата на ДДВ, како што кажа Бектеши, негативно ќе влијае во пресметките што ги прави Регулаторната комисија за енергетика за одредување на цената на електричната енергија по 1 јануари на регулираниот пазар, а со тоа и на сметките што ги плаќаат граѓаните.
Случајот со големи фирми кои преку „шема“ незакоснки користат струја од регулираниот пазар беше објавен пред неколку дена. Големи фирми сè уште се снабдуваат со поевтина електрична енергија, која според законот не им следува, користејќи „шема“ преку отворање на мали фирми „ќерки“ со до 20 вработени и со закупување на нивното броило.
На регулираниот пазар на електрична енергија се домаќинствата и малите и микро компаниите, но не плаќаат иста цена. Домаќинствата плаќаат една, а малите и мирко фирмите друга цена, која сепак е помала во однос на онаа од слободниот пазар каде со електрична енергија се снабдуваат големите фирми.