Претходно Зеленски го повика американскиот претседател да ја посети Украина со цел самиот да добие слика за тоа каква е ситуацијата таму, речиси два месеца од почетокот на конфликтот, но Белата куќа соопшти дека Бајден засега не планира да ја посети Украина
Американскиот претседател Џо Бајден моментно не планира да ја посети Украина, и покрај поканата од украинскиот колега Володимир Зеленски, соопшти портпаролката на Белата куќа, Џен Псаки, но додаде дека Бајден планира да одржи состанок со сојузниците, во врска со украинската криза.
Претходно Зеленски го повика американскиот претседател да ја посети Украина со цел самиот да добие слика за тоа каква е ситуацијата таму, речиси два месеца од почетокот на конфликтот.
„Мислам дека тој е водач на САД и затоа би требало да дојде тука и да види“,
изјави Зеленски во неделата во интервју за Си-ен-ен.
Белата куќа соопшти дека наместо Бајден поверојатно е во Украина да отиде висок функционер како државниот секретар Ентони Блинкен или министерот за одбрана Лојд Остин, а претседателот на САД планира денеска да одржи разговор со сојузниците околу украинската криза.
Во соопштението на Белата куќа се наведува дека Бајден преку видеоповик со сојузници и партнери ќе разговара за континуирана поддршка за Украина, како и за напорите Русија да се прогласи за одговорна.
Медиуми пишуваат дека на средбата ќе дебатираат лидери на Франција, Германија, Велика Британија, Канада, Италија, Полска, Романија, како и генералниот секретар на НАТО, Јенс Столтенберг, претседателката на Европската комисија, Урсула фон дер Лајен, но и претседателот на Европскиот совет, Шарл Мишел.