Покрај најавата за дополнителна испорака на оружје, американскиот претседател во заминување го осуди вчерашниот божиќен напад на Русија врз дел од украинските градови
Американскиот претседател во заминување Џо Бајден побара од Министерството за одбрана да продолжи со масовните испораки на оружје за Украина, нагласувајќи дека САД ќе продолжат да ја јакнат украинската одбрана.
„Во последниве месеци, Соединетите Држави испорачаа стотици проектили за противвоздушна одбрана на Украина, а има уште, кои треба да бидат испорачани. Му наложив на Министерството за одбрана да продолжи со испораката на оружје за Украина, а САД ќе продолжат да работат неуморно и да ја јакнат позицијата на Украина во нејзината одбрана од руските сили“,
се наведува во соопштението на Белата куќа.
Покрај најавата за дополнителна испорака на оружје, Бајден го осуди вчерашниот божиќен напад на Русија врз некои од украинските градови.
„Целта на овој срамен напад беше да се прекине пристапот на Украинците до греење и електрична енергија во текот на зимата и да се загрози безбедноста на нивната мрежа“,
рече Бајден.
Бајден потенцира дека украинскиот народ заслужува да живее во мир и безбедност, а САД и меѓународната заедница мора да продолжат да бидат поддршка за Украина додека таа не победи во конфликтот.
Од почетокот на руската инвазија во 2022 година, Вашингтон одвои 175 милијарди долари помош за Украина.