Зборувајќи за тоа што ја одбележано првата година од мандатот, американскиот претседател ја истакна кампањата за масовна вакцинација, а во однос на пандемијата порача дека иако некои луѓе ова го нарекуваат „нова нормалност“ тој не смета дека е така и порачува оти работата не е завршена и ќе оди кон подобро. Сојот омикрон, според него, не е причина за паника
Тој се пофали и со падот на стапката на невработеност на 3,9 отсто и најави огромна социјална реформа, а зборуваше и за тензиите со Русија околу ситуацијата во Украина
Американскиот претседател Џо Бајден на прес-конференција во Белата куќа по повод првата година од неговото претседателствување изјави дека тоа е година на предизвици, но и на огромен напредок.
На прес-конференција во Белата куќа за одбележување на првата година од мандатот, Бајден особено ја потенцира кампањата за масовна вакцинација против ковид-19 и притоа истакна дека 75 отсто од возрасните Американци сега се целосно имунизирани, во споредба со еден отсто кога неговата администрација ја презеде власта.
Зборувајќи за пандемијата, тој рече дека е свесен дека Американците се фрустрирани од целата ситуација и нејзините последици врз економијата.
„По речиси две години физички, емоционални и психолошки последици од оваа пандемија, за многумина од нас беше премногу. Некои луѓе можеби ова го нарекуваат ’нова нормалност‘, но јас ја нарекувам работа што сè уште не е завршена. Работите ќе одат на подобро. Најдобрите денови на оваа земја сè уште се пред нас, а не зад нас“,
рече Бајден.
Тој нагласи дека САД ќе истраат во напорите да се вакцинираат против коронавирусот бидејќи се покажало дека оваа практика функционира. Бајден додаде дека САД нема да се вратат на карантин и затворање на училиштата и дека новата тензија предизвикана од омикрон не е причина за паника.
Американскиот претседател, исто така, се пофали со „рекордно отворање работни места“, односно падот на стапка на невработеност која сега изнесува 3,9 отсто, во однос на 6,4 отсто пред една година.
„Ако економската статистика е импресивна, инфлацијата е исто така спектакуларна, и тоа е она што ги загрижува Американците денес. Борбата со оваа инфлација, на нејзиното највисоко ниво во речиси 40 години, ќе бара долгорочен напор. А, дотогаш, тоа ќе биде болно за многу луѓе“,
рече Бајден.
Тој зборуваше и за односите со Русија и прашањето за Украина и нагласи дека Москва ќе сноси одговорност доколку ја нападне Украина.
„Ако Русија оди во Украина, тоа ќе има катастрофални последици. Претпоставувам дека Путин ќе тргне кон Украина“,
рече американскиот претседател и додаде дека целосната инвазија на земјата, сепак, ќе предизвика одговор што скапо ќе ја чини Русија и нејзината економија.
Бајден рече дека верува оти Русија подготвува акција во Украина, иако смета дека Путин сè уште не донел конечна одлука. Тој истакна дека ќе го ограничи пристапот на Русија до меѓународниот банкарски систем доколку ја нападне Украина.
Блокирани закони, низок рејтинг
Во време кога Бајден одбележа една година на власт, два клучни дела од неговата агенда се заглавени во Конгресот, додека пандемијата со ковид-19 продолжува да предизвикува хаос дома и во странство.
Неговата популарност во анкетите постојано опаѓа по ненадејното повлекување на американските сили од Авганистан во септември минатата година. Неговиот просечен рејтинг е нешто повеќе од 40 отсто, а во анкетата објавена минатата недела од Универзитетот „Квин“, неговата политика има поддршка од само 33 отсто.
Нискиот рејтинг на Бајден е резултат и од незадоволството како тој се спротивстави на пандемијата, и покрај интензивната кампања за вакцинација од страна на администрацијата. Експертите за јавно здравје ја критикуваа администрацијата дека не ја предвидела појавата на соевите делта и омикрон, како и за неуспехот да го зголеми капацитетот за тестирање за ковид-19, вклучително и обезбедување пристап до брзо тестирање за сите Американци.
Иако Бајден успеа да протурка огромен пакет од илјада милијарди американски долари преку Конгресот за да ја подобри инфраструктурата, неговите обиди да обезбеди усвојување на пакет од 1 800 милијарди американски долари за социјалните програми и борбата против климатските промени во Сенатот наиде на противење од демократски сенатор, умерениот Џо Менчин од Западна Вирџинија, кој има клучен глас во поделениот Сенат.
Менчин и Кирстен Синема од Аризона, уште една умерена демократка во Сенатот, исто така го блокираат усвојувањето на два закони за правата на глас поддржани од Бајден. Двајцата се против менување на долгогодишното владеење на Сенатот – таканаречениот филибастер, според кој е неопходно да гласаат 60 од 100 сенатори за предлог-законот да биде ставен на конечно гласање.
Прес-конференцијата вчера е 10-та откако Бајден ја презеде функцијата, што е значително помалку од неговите претходници, почнувајќи од Џорџ Буш, според податоците собрани од Универзитетот Калифорнија.