Денеска се регистрирани 80 починати, а досега вкупно во изминатите години починаа три илјади лица
Австралија го регистрира најлошиот ден според бројот на починати како последица од ковид со 80 починати лица.
Премиерот на Нов Јужен Велс, Доминик Перотет, сепак рече дека намалениот број на приеми во болница му дава надеж за притисокот од ова ново ширење на инфекцијата врз здравствениот систем.
Претходниот најголем број од 78 смртни случаи од коронавирус беше забележан во вторникот. Во Австралија, досега нешто помалку од 3 000 луѓе починале од почетокот на пандемијата со коронавирус.
Нов Јужен Велс, каде што се наоѓа Сиднеј, имаше 46 смртни случаи. Тука спаѓа и смртта на бебето од ковид-19 во декември.
Веста за бројот на починати доаѓа во време кога премиерот на Западна Австралија Марк Магауан се откажа од ветувањето дека ќе ја отвори оваа држава за остатокот од земјата на 5 февруари.
Говорејќи на прес-конференција доцна синоќа, Магауан рече дека планирањето за повторно отворање на државата би било „несовесно и неодговорно“ со оглед на големиот број случаи на ковид-19 во другите австралиски држави.
Тој не даде нов датум кога таа држава би можела да ги олесни мерките околу затворените граници.