Град Скопје во ниту еден момент не бил носител на лиценца, напротив до енергетската криза на сите Влади очигледно им одговарало енергетските ресурси со кои се произведува, дистрибуира и снабдува со енергија, да бидат во рацете на приватници наместо да се третираат како национални ресурси кои се од исклучителен јавен интерес, коментира скопската градоначалничка на Фејсбук
Претходно денеска, премиерот Димитар Ковачевски кажа дека управувањето со парното греење во Скопје е обврска на Град Скопје, но дека Арсовска и ВМРО-ДПМНЕ тоа го одбиле оти се занимавале со тендери наместо со проблемите на скопјани
Владата е таа која има дадено повеќегодишна концесија на БЕГ, а нејзина обврска и одговорност е да се справи и со последиците кои произлегуваат од таа концесија, коментира на Фејсбук градоначалничката Данела Арсовска реагирајќи на изјавата на премиерот Димитар Ковачевски кој кажа дека наместо Градот Скопје да ја преземе обврската за управувањето со парното во главниот град, тоа мора да го прави Владата.
Ковачевски во интервјуто за МРТ кажа дека управувањето со парното греење во Скопје е обврска на Град Скопје, но дека Арсовска и ВМРО-ДПМНЕ тоа го одбиле оти се занимавале со тендери наместо со проблемите на скопјани.
Во своја одбрана, Арсовска коментира дека според Законот за енергетика, вршителите на енергетските дејности се лица кои поседуваат лиценца од Регулаторната комисија за енергетика (РКЕ) за период од три до 35 години согласно видот на енергетската дејност, видот и обемот на обврската за обезбедување јавна услуга во вршењето на енергетската дејност, обемот на средствата потребни за извршување на енергетската дејност, времетраењето на правото за користење на соодветниот енергетски ресурс.
„Град Скопје во ниту еден момент не бил носител на лиценца, напротив до енергетската криза на сите Влади очигледно им одговарало енергетските ресурси со кои се произведува, дистрибуира и снабдува со енергија, да бидат во рацете на приватници наместо да се третираат како национални ресурси кои се од исклучителен јавен интерес. Владата кога беа милионски профитите на приватните компании кои раководеа со топловодната енергетска мрежа одбиваше таа да биде одземена од истите и да претставува национален ресурс, за сега да бара виновник за сопствените одлуки“,
пишува Арсовска на фејсбук.
Она што загрижува, додава таа, е неинформираноста на институциите за сопствените ингеренции кога станува збор за системот за снабдување со топлинска енергија односно парно греење.
„Колку за потсетување, уште на 10.01.2022 година премиерот Ковачевски се пофали дека Владата нема да дозволи граѓаните на Скопје да останат без греење, за сега на веќе започната грејна сезона, наместо функционално решение граѓаните да се соочуваат со ладни радијатори“,
посочи Арсовска, додавајќи дека со навремена реакција на Владата сега немало да има толку големи проблеми.