Нарекувајќи ја самопрогласена реформаторка на јавниот превоз, од партијата на Мицкоски вчера обвинија дека градоначалничката го довела Скопје на раб на колапс. Од владејачката партија додадоа дека советниците на ВМРО-ДПМНЕ се подготвени да го поддржат предлогот за набавката на нови автобуси ако Арсовска е подготвена да покаже отчетност
Ако јас сум кума на хаосот, ти си гробарот на јавниот превоз – му се обрати преку писмено соопштение скопската градоначалничка Данела Арсовска на премиерот Христијан Мицкоски, откако вчера од неговата партија ја доби квалификацијата „кума на хаосот со јавниот превоз во Скопје“.
Реформата за јавниот превоз која ја споменуваат од ВМРО-ДПМНЕ, се додава во соопштението на Град Скопје, е ветувана од страна на Мицкоски и Арсовска пред скопјани, а советниците од неговата партија сега ја саботираат реформата и со тоа, како што се додава, го доведуваат јавниот превоз до колапс.
„Мицкоски, ти не гласаш за нови автобуси затоа што побарав сите партии во советот на Град Скопје да се вклучат во избор на спецификација и услови за набавка, ама така ти, ‘патриоту’ Мицкоски, нема да можеш да преговараш со производители на автобуси како што правеше на почетокот на мандатот кога за тебе бев најдобриот менаџер во Европа. Ајде ‘патриоту’ Мицкоски одлучи се, или сум јас најдобриот менаџер во Европа кој ти со твоите мицковистички полтрони во советот го саботираш, или сум најлошиот градоначалник кој е твој избор, градоначалник кој ти го молеше да го поддржиш на избори бидејќи твоите кандидати не ти се допаѓаа и не ти биле доволно градски луѓе“,
пишува Арсовска во соопштението испратено од Град Скопје.
Нарекувајќи ја самопрогласена реформаторка на јавниот превоз, од партијата на Мицкоски вчера обвинија дека градоначалничката го довела Скопје на раб на колапс. Од владејачката партија вчера рекоа дека советниците на ВМРО-ДПМНЕ се подготвени да го поддржат предлогот за набавката на нови автобуси ако Арсовска е подготвена да покаже отчетност пред граѓаните.
„Во спротивно, ова апокалиптично сценарио на коешто скопјани се принудени да се адаптираат секојдневно ќе продолжи. Пешачење со километри, доцнење на работа стана секојдневие затоа што неспособноста на Арсовска го сведе јавниот превоз да стане мисловна именка“,
порачаа од ВМРО-ДПМНЕ во писменото соопштение.
Од партијата ја критикуваа Арсовска и оти вчера не се појавила на седницата за советнички прашања.