Претседателот и врховен командант на вооружените сили Стево Пендаровски денеска врз основа на член 18 , став 1, точка 5 и член 28, од Законот за одбрана, како и генералната наредба за ангажирање на дел од Армијата во мирновремени услови, кога не е прогласена кризна, вонредна или воена состојба, потпиша наредба дел од силите и средствата да се ангажираат за поддршка на државните институции за справување со последиците од пандемијата на коронавирусот, која веднаш стапува во сила.
Согласно наредбата на претседателот на државата, Генералштабот на Армијата ќе ангажира сили и средства за медицинска поддршка на работата на здравствените установи и центри на Министерството за здравство, транспорт на заштитни и медицински средства и опрема.
Армијата ќе помага и за обезбедување магацински простор за складирање на заштитни и медицински средства и опрема, поставување шатори и друг вид сместувачки капацитети наменети за лекување на заболени лица, како и за дезинфекција на простории и површини.
За спроведување на овие задачи, Генералштабот на Армијата е должен да ги подготви за ангажирање медицинските, силите за транспорт и силите за АБХО на Армијата.
Армијата и претходно врз основа на истите правни основи била ангажирана во отстранување на последици од елементарни непогоди и поддршка на државните институции во мирновремени услови.
Владата на седницата пред два дена донесе заклучок да се побара согласност од претседателот Стево Пендаровски за ангажирање на Армијата.
Предлогот е од Министерството за здравство, а останатите министри во Владата на седница го прифатиле.