Од 81 општина, 65 во октомври постигнале заштеда од најмалку 15 отсто, од нив 12 општини постигнале заштеда поголема од 50 проценти. Шеснаесет општини не успеале да заштедат повеќе од 15 отсто, а само три имале поголема потрошувачка во 2022 година, рече Бектеши
Три општини во државава, во време на енергетска криза, трошеле повеќе струја од лани. Станува збор за општините Арачиново, Студеничани и Лозово. Најголем трошаџија била општина Арачиново која во октомври годинава, споредено со октомври во 2021 година, потрошила за 474 проценти повеќе електрична енергија, што значи дека потрошувачката е речиси пет пати поголема. Во Студеничани зголемувањето е 11 проценти, а во Лозово е 12 проценти, информираше на денешната прес-конференција министерот за економија Крешник Бектеши.
„Од 81 општина , 65 во октомври постигнале заштеда од најмалку 15 отсто, од нив 12 општини постигнале заштеда поголема од 50 проценти. Шеснаесет општини не успеале да заштедат повеќе од 15 отсто, а само три имале поголема потрошувачка во 2022 година“,
рече Бектеши.
Општините кои заштедиле помалку во месец октомври 2022 година споредено со истиот месец лани се Македонска Каменица, Карбинци, Росоман, Кочани, Охрид, Петровец и Старо Нагоричане.
Општините кои заштедиле најмногу во месец октомври 2022 година споредено со октомври 2021 година се Новаци, Штип, Сопиште, Кичево и Пласница.
На новинарско прашање дали ќе има казни за тие што не штеделе струја, Бектеши рече дека за општините има само препорака за заштеда струја од 15 проценти и нагласи дека има поделеност меѓу централната и локалната власт.