Пресудата од второстепениот суд вчера пристигнала во Кривичен, од каде што велат постапувањето е во тек, односно процедурата предвидува сега судија за извршување санкции да издаде упатен акт за во кој затвор и кога осудениот да почне да ја извршува казната
Откако вчера министерот за правда Бојан Маричиќ прв соопшти дека има информации оти Апелацискиот суд за сообраќајката кај „Млечниот ресторан“ во Скопје ја преиначил условната во затворска казна од две години, денеска се огласи и Јавното обвинителство кое наведува дека Апелација ги прифатила укажувањата дека Основниот кривичен суд не ги ценел доволно отежнувачките околности.
„Апелациониот суд во целост ја анализираше утврдената фактичка состојба во предметот. Притоа, со донесената пресуда оцени дека во конкретниот случај постои правилна примена на материјалното право, со оглед на тоа што во дејствијата на обвинетиот прецизно се опишани елементите на кривичното дело кое му се ставаше на товар со поднесеното обвинение и за кое обвинетиот беше огласен за виновен со првостепената пресуда. Ценејќи ја, пак, одлуката за кривичната санкција, Апелациониот суд ги прифати наводите на ОЈО Скопје, потврдени и со писмениот предлог на Вишото јавно обвинителство Скопје, согласно кои првостепениот суд во недоволна мера ги ценел отежнувачките околности и дека целта на казнувањето во конкретниот случај не може да се оствари со изречената алтернативна мерка – условна осуда“,
соопштија од Јавното обвинителство.
Во сообраќајката пред нешто повеќе од две години настрада млад брачен пар кој се возел на мотор по булеварот „Теодосиј Гологанов“ откако во нив удри автомобил. Загина младиот Гоце Димитриевски, а неговата сопруга, Наташа, го загуби плодот и заврши со тешки повреди.
Осудениот за овој настан се гонеше за тешки дела против безбедноста на луѓето и имотот во сообраќајот. Покрај двегодишната затворска казна, Апелација му одреди и забрана од две години за возење на возило од Б-категорија, која забрана ќе почне да тече откако ќе излезе од затвор.
Пресудата од второстепениот суд вчера пристигнала и во Кривичен, од каде што велат постапувањето е во тек, односно процедурата предвидува сега судија за извршување санкции да издаде упатен акт за во кој затвор и кога осудениот да почне да ја извршува казната.
Кога беше објавена првостепената, условна пресуда, случајот „Млечен“ ја возбуди домашната јавност. Причината беше што виновник за сообраќајна незгода со смртни последици не е осуден на казна затвор.
Но, според истражувањето на „360 степени“, пресудата кај „Млечен“ не е исклучок туку правило. Односно, во најголемиот дел од случаите, кога виновниот возач признал вина и не бил под дејство на алкохол, казната била или условна или до една година затвор, дури и кога бил прегазен пешак на пешачки премин.