Лидерот на партијата Левица е против електронско гласање, оценувајќи го актуелниот предлог на власта како маневар и ставање пред свршен чин на тема која претходно воопшто не била дел од преговорите
Лидерот на Левица, Димитар Апасиев, е подготвен на политички договор со власта околу измените на Изборниот законик, но под строг услов, кој според него би значело прифаќање на гласање по пошта за дијаспората, но само доколку се изгласа една изборна единица. Во интервју за „Слободен печат“, тој порача дека компромисот мора да биде взаемен, предлагајќи поштенското гласање на иселениците да се примени како експериментален модел и тоа само на претседателските избори.
Апасиев вели дека претседателските избори се единствените кои бараат цензус на излезност, а вели и оти шефот на државата ја претставува земјата во меѓународните односи, па затоа има целосна смисла дијаспората да учествува токму во неговиот избор. Тој потсети дека прашањето за една изборна единица, кое го оценува како хроничен проблем на македонското изборно законодавство, партијата го покренала уште на лидерската средба по Божиќ. Што се однесува до можноста за електронско гласање на дијаспората, лидерот на Левица изрази категорично противење, посочувајќи дека таква практика во светот имаат само Франција и Естонија.
„Формулацијата или-или (или електронско или гласање или по пошта) можат да ја постават само вмровците да нудат алтернатива, а да те стават пред свршен чин. Тоа е ВМРО-вски мајмунлак којшто јас го истакнав. Тоа воопшто не беше споменато во четиримесечните преговори, постојат записници за тоа и одеднаш се појави како прашање на живот и смрт. Никој тоа не го бара, па дури ни самата дијаспора“,
вели тој.
Дополнителтно, Апасиев предупредува на огромна опасност од злоупотреба на гласовите на иселениците, нагласувајќи дека ВМРО-ДПМНЕ нема кредибилитет да бара вакво нешто бидејќи како што кажа, надежите на власта се темелат на очекувањето дека преку Македонската православна црква, која според него е секогаш десничарски настроена, ќе успеат да ги мобилизираат овие гласачи исклучиво во нивна корист.
Токму затоа, приоритет во изборното законодавство за Левица остануваат една изборна единица и решавањето на финансирањето на платеното политичко рекламирање.
„И хронично и акутно проблемот со македонското изборно законодавство е немањето една изборна единица. Ние, како партија која е најоштетена од овој изборен циклус, имаме право да го иницираме и тоа прашање да го кренеме високо на агендата. Еве колку за споредба, на изборите 2020 година кога Левица стана прв пат парламентарна партија, со два пратеника, со истиот број гласови, доколку беше една изборна единица, ние ќе имавме пет пратеници. Значи, ние на секои избори сме оштетени за 3 до 4 пратеника од овој изборен модел“,
заклучи тој.