Граѓаните одговарале и на прашањето „Што е најмалку прифатливо за вас во односите со Бугарија“. За 45% од Македонците се неприфатливи сите барања на Бугарија, додека најголем број од етничките Албанци (30,7%) одговориле дека за нив е најмалку прифатливо во ЕУ да не се употребува терминот „македонски јазик“
Мнозинство од граѓаните веруваат дека Владата нема да попушти пред притисокот од соседна Бугарија, покажува анкетата на Македонскиот центар за меѓународна соработка (МЦМС) и Телма ТВ посветена на релациите меѓу Македонија и Бугарија, а во светло на отпочнувањето на преговорите со Европската Унија (ЕУ).
Резултатите покажуваат дека вкупно 54,7% „воопшто“ или „до некаде не се согласуваат“ со изјавата дека Владата ќе се согласи со сè што ќе побара Бугарија.
Малку повеќе од третина (37,4%) рекле дека целосно или до некаде сметаат дека Владата ќе се „
Разлики во одговорите можат да се видат кај најголемите етнички заедници, па така, 61,3% од етничките Македонци воопшто или до некаде не се согласуваат со таа изјава, а од нив, 44,8% воопшто не се согласуваат со оваа изјава, додека 56,6% од испитаниците етнички Албанци рекле дека целосно или до некаде се согласуваат со изјавата“, објави МЦМС.
На прашањето „Што е најмалку прифатливо за вас во односите со Бугарија“, пак биле понудени неколку одговори, а граѓаните најчесто или 27% од нив го избирале одговорот сите од наведените барања на источниот сосед се неприфатливи.
За речиси една петтина од оние кои решиле да изберат своја црвена линија, најнеприфатливо е признавањето дека Гоце Делчев и припаѓа на Бугарија и на нејзината историја. Потоа, за 18,3% од граѓаните црвената линија е дека македонската нација не постоела пред 1944, додека за 14,9% најнеприфатливо е да не се употребува терминот „македонски јазик“ во ЕУ.
За 45% од Македонците сите барања на Бугарија се неприфатливи
Кога станува збор само за македонската етничка заедница, за 45% од Македонци сите изјави се неприфатливи. На второ место е припадноста на Гоце Делчев која е најважна за 34%, а потоа е постоењето на македонската нација која е црвена линија за 25,3% од граѓаните Македонци.
За најголем број од Албанците неприфатливо е барањето на Бугарија за македонскиот јазик
Најголем број од етничките Албанци (30,7%), пак, црвената линија ја поставиле на македонскиот јазик во ЕУ, а веднаш потоа е постоењето на македонската нација (23,2%).
За МЦМС и Телма, анкетата ја спроведе М-проспект. Анкетирањето на граѓаните е направено преку телефонска анкета во периодот од 31 октомври до 5 ноември 2020 година. Анкетата е направена на национално репрезентативен примерок од 1000 испитаници постари од 18 години.
Истражувањето е дел од проектот „ЕУро Фокус“, што го поддржа проектот „Нордиска поддршка за напредокот на Северна Македонија“.