Бугарскиот копретседавач на комисијата вели дека неговите македонски колеги не сакаат да ја видат потребата од поинакво толкување на историјата и поради тоа ја губи довербата во нивната професионалност и колегијалност. Исто така, во одговорот на интервјуто на Ѓоргиев, повторно ја обвинува македонската страна дека ја прекинала работата во комисијата
Нашите македонски колеги се однесуваат како чувари на митови, се прашувам дали ќе се однесуваат како идеолози на оваа антибугарска позиција на која бевме сведоци во последната година, вели во интервју за БТВ бугарскиот историчар Ангел Димитров, кој е копретседавач на заедничката историска комисија помеѓу Бугарија и Северна Македонија.
Неговите изјави се одговор на интервјуто на копретседавачот од македонската страна, Драги Ѓоргиев, кој за истата телевизија зборуваше за работата на оваа комисија.
Ѓоргиев во интервјуто претходно порача дека не може бугарската страна постојано да ја обвинува македонската и да тврди дека само нејзиниот пристап е исправен, а притоа да очекува другата страна да не реагира и да го прифати тоа.
„Кога имаме целосно разединување на ставовите и не сакаме да ја видиме потребата за поинакво толкување на минатото, зборувам за македонските колеги, тогаш навистина ја губам довербата во професионалната и колегијална работа“,
вели Димитров.
Бугарскиот копретседавач одговара и на обвинувањата на Ѓоргиев дека Бугарија не ги признава македонскиот јазик и нација.
„Има признание, но тоа е по Втората светска војна и тоа е гледиштето на бугарската политичка елита. Тоа е во целосна спротивност на тезите што нашите колеги се обидуваат да ги поддржат. Тие се обидуваат да шпекулираат“,
вели Димитров.
На ова прашање Ѓоргиев коментираше во контекст на дебата за Гоце Делчев и во интервјуто праша како македонскиот тим од комисијата да даде препорака за заедничко чествување на Делчев кога од другата страна имате држава која не ви ги признава јазикот и нацијата.
Димитров одговара и на делот од интервјуто на неговиот македонски колега Ѓоргиев во кое тој истакна дека виновна за застојот во преговорите е бугарската страна, која одбила за време на пандемијата да се одржуваат онлајн-средби, а во бугарската јавност било погрешно претставено – дека Северна Македонија ја прекинала работата. Димитров ги отфрла ваквите обвинувања и останува на познатите ставови.
„Тие едноставно ја прекинаа работата пет месеци пред предвремените избори кои беа закажани во Северна Македонија пролетта 2020 година. Тие се повлекоа од состаноците, а паузата продолжи поради пандемијата. Изгубивме скоро една година. Ако бидам подиректен, ќе кажам дека тие загубија три години поради својата неподготвеност да ја прифатат формулацијата, дури и оние формулации во Договорот за пријателство и добрососедство“,
вели Димитров.