Премиерот во врска со именувањето на нов директор на Агенцијата за национална безбедност не соопшти повеќе детали. Инаку, дека АНБ ќе има нов директор, Ковачевски најави пред 20 дена во екот на скандалот со македонското државјанство на контраверзниот Украинец, Олександр Онишченко, кое неодамна Владата го поништи. Сепак, како што изјави Ковачевски тогаш, случајот „Онишченко“ не е причината за промената на раководната позиција во АНБ, туку заминувањето на Димовски за амбасадор на земјава во Франција
Денешната најава на премиерот го отвора и прашањето кој ќе седне на столчето за отчет пред Комисијата за надзор над работата на АНБ во врска со случајот „Онишченко“, која остана незавршена поради безбедносниот пропуст на јутјуб-каналот на Собранието, кога протече тонско парче од реферирањето на Димовски. Собранискиот спикер вчера соопшти дека Законодавниот дом го добил извештајот од истрагата на МВР за пропустот и дека ја известил надлежната Комисија дека има предуслови за продолжување на седницата
Утре на седница Владата ќе именува нов директор на Агецијата за национална безбедност (АНБ), на местото на Виктор Димовски, кој заминува на амбасадорското место во Париз, соопшти денеска премиерот, Димитар Ковачевски.
„Утре ќе има нов директор на АНБ“,
изјави премиерот Димитар Ковачевски одговарајќи на новинарско прашање на денешната прес-конфереција во Владата, на која заедно со министерката за труд и социјална политика го презентираа Предлог-буџетот на МТСП, Јована Тренчевска.
Освен дека името на новиот директор на АНБ ќе биде познато утре, Ковачевски не соопшти повеќе детали.
Инаку, дека ќе има нов директор на Агнецијата задолжена за безбедноста на државата, Ковачевски најави пред дваесетина дена.
„Да, ќе имаме нов директор на АНБ и тоа ќе се случи би рекол во наредните 24 дена, именување на нов директор на АНБ. Треба да биде професионалец со долгогодишно искуство и ќе треба исто така да ги помине и филтрите на институциите на стратешките партнери, бидејќи да не заборавиме ние сме земја членка на НАТО, имаме Договор за стратешко партнерство со САД и изборот треба да биде усогласен со исполнување на такви критериуми“,
изјави Ковачевски на 22 ноември, ден пред да ја почне постапката за поништување на државјанството на Онишченко.
Заминувањето на Димковски и доаѓањето на ново лице на чело на АНБ се случува по скандалот со доделувањето на македонско државјанство на контроверзниот Украинец, Олександр Онишченко, за што меѓу другите позитивно мислење дала и Агенцијата за национална безбедност. Сепак, како што изјави Ковачевски тогаш, случајот „Онишченко“ не е причината за промената на раководната позиција во АНБ, туку заминувањето на Димовски за амбасадор на земјава во Франција.
Димовски во два наврати реферираше за пропустот на АНБ со Онишченко, еднаш пред надлежната собраниска комисија и вторпат на затворена седница на Владата.
Сепак, седницата на Комисијата за надзор над работата на АНБ и на Агенцијата за разузнавање, која исто така беше затворена за јавноста поради класифицираните материјали, остана незавршена и беше суспендирана од претседателот на Законодавниот дом, поради безбедносен пропуст, кога дел од отчетот на Димовски за случајот одеше тонски на јутјуб-каналот на Собранието.
Во врска со инцидентот, Министерството спроведе истрага и извештајот од наодите го достави до Собранието и Основното јавно обвинителство Скопје.
Денешната најава на премиерот дека утре ќе има нов директор на АНБ, го отвора и прашањето кој ќе седне на столчето за отчет во Комисијата за надзор над работата на АНБ.
Вчера, собранискиот спикер, Џафери соопшти дека го добил извештајот на МВР и ја известил Комисијата дека постојат предуслови за продолжување на седницата за случајот „Онишченко“
„Определена е друга просторија каде во наредниот период ќе може да се одржува седницата“,
рече Џафери вчера на заедничката прес-конференција со претседателот на Собранието на Косово Глаук Конјуфца.
Инаку, во врска со случајот „Онишченко“ исходот досега е следен: Владата му го поништи државјанството, Димовски (по седницата на собраниската комисија пред да биде прекината) соопшти дека потфрлила последната алка од ланецот на проверки во АНБ, односно не биле консултирани партнерите во НАТО, тој заминува за амбасадор во Париз, а на негово место во Агенцијата утре ќе дојде друго лице, а во меѓувреме, како што известија дел од медиумите, поведена е постапка за суспензија на двајца вработени во АНБ.
Во врска со именувањето на новиот директор на АНБ, пратеникот и потпретседател на ВМРО-ДПМНЕ, Александар Николоски на 23 ноември, одговарајќи на новинарско прашање, излезе со тврдење дека за функцијата прв човек на АНБ се води „клановска битка во СДСМ“.
„Постапката за избор на директор на АНБ трае шест до седум месеци вкупно досега. Единствената причина зошто досега не е избран нов директор на АНБ е затоа што постои клановска битка во рамки пред се на владејачката СДСМ кој од клановите таму ќе наметне свој директор на АНБ. Еден клан е близок до министерот за внатрешни работи (Оливер Спасовски н.з.), друг клан е близок до генералниот секретар на партијата (Миле Зечевиќ н.з.), трет клан е близок до поранешниот премиер (Зоран Заев н.з.), четврти клан е близок до актуелниот премиер (Димитар Ковачевски н.з.). Четири клана се борат во рамки на СДСМ кој да наметне директор на АНБ и затоа му го направија тоа понижување на Виктор Димовски да дојде на Комисија за контрола на АНБ и АР“,
изјави Николски, чија партија барање Димовски да си поднесе оставка како чин на морална одговорност.
Состојбите во АНБ тој ги критикуваше и во гостувањето во емисијата „360 степени“ на 25 ноември кога рече дека Агенцијата е обезглавена бидејќи покрај случувањата поврзани со директорот, 16 месеци нема ниту прв човек на внатрешната контрола.
Според ставовите на Николовски во однос на Димовски, пак, тој не треба да замине за амбасадор во Франција бидејќи тоа ќе биде срам за Македонија со оглед дека Франција е една од најзначајните членки на ЕУ.