Американската Управа за храна и лекови (ФДА) синоќа итно го одобри експерименталниот третман за лекување со антитела во итни случаи кај пациенти постари од 65 години, кои освен коронавирус имаат и друга хронична болест.
Се работи за лекот „бамланаивимаб“ кој според клиничките испитувања ја намалува веројатноста за хоспитализација кај пациенти со коронавирус.
Поради тоа, дополнителен услов е тие што ќе го примаат да не се хоспитализирани.
Овој експериментален лек засега може да се користи во случаи на лесна или умерена состојба на заболувањето, како и кај деца постари од 12 години, така и кај возрасни.
Лекот, зад кој стои компанијата „Елија Лили“, според ФДА не им помагал на пациенти со потешка форма на коронавирус, туку напротив, се покажало дека им одмага
„Бамланаивимаб“, исто така, не може да се користи кај пациенти кои се на кислородна терапија.
За само два дена, ова е втора позитивна вест која доаѓа од САД, а се однесува на борбата со коронавирусот.
Вчера компанијата „Фајзер“ објави дека вакцината против ковид-19 што ја развива со „Бионтех“ покажала 90-процентна ефикасност.
Ова, како што тврди производителот, го покажале резултати од спроведената голема студија. Од компанијата уште истакнуваат дека нивната анализа покажала многу подобри перформанси отколку што се надевале повеќето експерти.
Тие тврдат дека немало сериозни несакани ефекти.
Во испитувањата во третата фаза учествувале повеќе од 43 000 луѓе. „Бионтех“ најави дека заедно со „Фајзер“ најверојатно идната недела ќе побара дозвола од американската Агенција за храна и лекови.