Претседателот на Собранието Талат Џафери смета дека нема расположение кај немнозинските пратеници, од нив најмногу Албанци, да гласаат за амандманите што ВМРО ДПМНЕ ќе ги поднесе на Законот за јазиците, по мислењето од Венецијанската комисија.
„Во Собранието има група закони кои се носат со двојно мнозинство т.е. со Бадентеровото мнозинство и секој подносител на таков предлог би требало да има предвид дека конечната одлука зависи од волјата на тие што се немнозински пратеници, а во оваа ситуација имајќи предвид дека мнозинството на немнозинските пратеници или Бадентеровото мнозинство го сочинуваат пратениците Албанци, предлагачите треба да обезбедат таква согласност, вели Џафери.
Според него, укажувањата од Венецијанската комисија не се обврзувачки, за разлика од донесените закони во Собранието кои треба да се спроведуваат се додека преку соодветна процедура не претрпат евентуална измена.
За забелешката дека дел од институциите не се во можност во моментот да ги спроведат сите аспекти на Законот за употреба на јазиците, Џафери смета дека работа на институциите е, на кои се однесува законот, во соодветно време да обезбедат предуслови за да може да ги спроведат законските одредби.
Со ваквиот став на Џафери се согласуваат и парламентарните партии Алијанса за Албанците и Беса.
Дескоска: Има неконзистентност на законите
И министерката за правда Рената Дескоска укажува дека ништо не може да се смени во Собранието без двотретинско мнозинство.
Во однос на имплементацијата на постоечкиот Закон, Дескоска укажува дека во делот на кривичните и граѓанските постапки не се применуваат одредбите од Законот за јазици.
„Законите за кривична и за парнична постапка се двотретински закони, и не може нивните одредби кои регулираат еден начин на употреба на јазикот, да бидат суспендирани од закон кој се носи со обично мнозинство. Во тој дел мислам дека забелешката на Венецијанската комисија е дека не смее да се дозволи правото на употреба на јазикот од лица кои што се носители на функции во судството, а не од страна на граѓаните кои имаат право да го користат својот мајчин јазик како обвинети, да го разберат судењето што се одвива против нив и да го дадат својот исказ“, рече Дескоска.
Таа признава дека има неконзистентност на двата закони (законите за постапките и Законот за јазиците). Но, она што е важно е дека не смее да се дозволи користењето на правото од страна на функционери да биде злоупотребено за попречнување на правдата и го посочи примерот со адвокатот на Груевски во една од постапките.
„Се надевам дека кој било релевантен фактор во државава нема да има цел со одредени одредби од законот за јазици да ја блокира правдата во нашата држава, да ги спречи постапките што се водат и да овозможи застарување на судските предмети“, истакна Дескоска.
Од пратеничката група на СДСМ велат дека за да ги коментираат амандманите што ги најави опозициската ВМРО-ДПМНЕ треба прво да ги видат.
„За тоа ќе треба посеопфатна дебата за да се донесе ставот, но знаеме добро дека став на Владата е да се имплементираат забелешките од Венецијанската комисија“, изјави пратеникот од СДСМ Костадин Костадинов.
Од ВМРО -ДПМНЕ сметаат дека власта има обврска да ги прифати измените што ги предлага опозицијата.
„Почитувањето на препораките на Венецијанската комисија е услов согласно францускиот нон-пејпер за добивање датум за отпочнување преговори со ЕУ. Власта да не си поигрува со европската иднина на Македонија и да се издигне над коалициските интереси“, рече пратеникот Драган Данев на прес-конференцијата во Собранието.
Премиерот Зоран Заев најави дека до крајот на неделата во владата ќе се организираат состаноци на соодветните институции за да се усогласи заедничко решение околу препораките на Венецијанската комисија за Законот за употреба на јазиците кои предизвикаа разногласие во владината коалиција за тоа дали мислењето ќе се имплементира со ревизија на законот, со корекција на одредени делови или се ќе остане на интерпретација. Рече дека не е запознаен со амандманите на опозициската ВМРО-ДПМНЕ, но истакна дека секојпат е добредојдена која било дебата што може да унапреди што било во државата.