Изборните калкулации за стратегиски прашања се политичка незрелост за партија која тврди дека е државотворник, велат од АА во одговорот до ВМРО-ДПМНЕ
Стратешките партнери на Република Северна Македонија, оние што континуирано го поддржуваат нашето патување кон НАТО и ЕУ, очекуваат од нас да ја отстраниме последната бариера за отворање на преговорите за членство во ЕУ: уставните измени.
Ова е дел од одговорот што од Алијанса за Албанците (АА) го упатуваат до ВМРО-ДПМНЕ откако од опозициската партија јавно го праша Арбен Таравари кој е тој меѓународен фактор што бара неговата партија да влезе во Владата.
Од АА велат дека секое друго сценарио различно од патот на земјава во НАТО и ЕУ ќе води кон изолација, несигурност и нестабилност во време кога Европа е повознемирена од кога било, но возвраќаат и со прашање до ВМРО-ДПМНЕ кој е тоа што бара од неа да работи спротивно на евроатлантските интереси на државата.
„РСМ нема друга алтернатива освен членство во ЕУ. Државниот разум треба да надвладее над политичките калкулации. На сите прозападни сили е да се заложат за конечно обединување на континентот. Жалиме што ВМРО-ДПМНЕ ја заборави својата понова историја и не научи од грешките. Изборните калкулации за стратешки прашања се политичка незрелост за партија која тврди дека е државотворник. Ги прашуваме ВМРО-ДПМНЕ, кои се тие сили или држави кои од нив го бараат спротивното од ова и спроведувањето на сценарија кои ја водат државата и регионот по опасен пат?“,
велат од АА.
Синоќа претседателот на оваа партија, Арбен Таравари во емисијата „Клик плус“ на ТВ 21 рече дека постои можност за влез на АА во Владата и оти тоа го бара меѓународниот фактор. Доколку и граѓаните го бараат тоа, рече Таравари, Алијанса би можела да стане дел од Владата. Сепак, нагласи тој, засега нема конкретна понуда нема, но има постојана комуникација.
Во реакцијата денеска од ВМРО-ДПМНЕ, пак, го прозваа да каже јавно кој е тој меѓународен фактор и порачаа дека доколу нема одговор тоа ќе значи дека Таравари не е искрен и има друга причина зошто сака да влезе во Владата.