Поради внатрешно-политичките проблеми во првите 100 дена од владејачката коалиција во Бугарија, личниот рејтинг на премиерот Кирил Петков падна од 39 проценти на 22,5 отсто, но тој и натаму ужива најголема поддршка меѓу партиските лидери во Бугарија
Во однос на спорот со Северна Македонија, во анкетата 19 отсто велат дека веруваат дека коалицијата ќе го најде вистинското решение за укинување на ветото за Северна Македонија да започне преговори со ЕУ
На евентуални предвремени избори во Бугарија, ГЕРБ би била прва политичка сила со 21,7 отсто пред Продолжуваме со промената на премиерот Кирил Петков, која би добила 18,4 отсто, покажува анкетата што ја спроведе агенцијата „Алфа рисрч“, пренесуваат медиумите во Бугарија.
Трета политичка сила, според анкетата, би била Бугарската социјалистичка партија со 10,2 отсто поддршка, а нејзината лидерка Нинова има поддршка од 18,3 отсто.
Движењето за права и слободи ужива 7,6 отсто доверба.
Има таков народ, кој е коалициски партнер, забележува пад во поддршката, па така партијата на Слави Трифонов има 4,5 отсто поддршка, или 2,1 отсто помалку од анкетата во февруари. Трифонов ужива поддршка од 13,5 отсто од Бугарите.
Поради внатрешно-политичките проблеми во првите 100 дена од владејачката коалиција во Бугарија, личниот рејтинг на премиерот Кирил Петков падна од 39 проценти на 22,5 отсто, но тој и натаму ужива најголема поддршка меѓу партиските лидери во Бугарија.
Довербата во бугарската влада падна од 39 отсто во февруари на 19 отсто во април.
Агенцијата оценува дека проблемите внатре во владината коалиција и личните битки дополнително ја намалиле првичната висока поддршка за кабинетот на Петков.
Најмногу веруваат дека владата ќе ја победи корупцијата, најмалку дека ќе се решат коалициските судири
Четириесет и шест отсто од полнолетните Бугари имаат песимистички очекувања за шансите на владата да ја надмине сегашната криза. Во однос на поедини прашања, 28% веруваат дека кабинетот ќе успее да ја спречи корупцијата, 26% дека ќе се справи со зголемената инфлација, 22% веруваат во амбицијата за модернизација економијата , 20% – во спроведувањето на судските реформи, 17 отсто очекуваат владата да обезбеди алтернативи за енергетските испораки на Русија, а 10 отсто се оптимисти дека тензиите меѓу коалициските партнери ќе бидат надминати.
Во однос на спорот со Северна Македонија, во анкетата 19 отсто велат дека веруваат дека коалицијата ќе го најде вистинското решение за укинување на ветото за Северна Македонија да започне преговори со ЕУ.
Руската инвазија на Украина останува главна тема за бугарските граѓани. Продолжува падот на довербата кај Бугарите во рускиот претседател Владимир Путин. Ако во првите две недели падот на рејтингот на Путин достигна 32 проценти, сега довербата во него падна на 25 отсто, а недовербата скокна на 61 отсто.
Многумина од учесниците во истражувањето, на кои и понатаму им се допаѓа Русија, изразија негативен став кон рускиот претседател Владимир Путин, што е новина за ставовите на јавноста во Бугарија.
Другата значајна промена е категоричното отфрлање на Русија како модел на државен и политички развој на Бугарија. Шотсто од испитаниците се на мислење дека местото на Бугарија е во сојуз со земјите од ЕУ и НАТО. Само 15 отсто сметаат дека местото на Бугарија е во сојуз со Русија и земјите околу неа.
Податоците покажуваат дека бугарското општество минува низ фаза на трансформација, која според „Алфа рисрч“ ќе има влијание не само на геополитичките ставови, туку и на поддршката за поединечните политички сили во Бугарија.
Анкетата е спроведена од 8 до 14 април 2022 година, меѓу 1 037 полнолетни граѓани на Бугарија, преку директно стандардизирано интервју.