Ако има таква одлука, тогаш ќе треба да се земат од граѓаните и да им се вратат на компаниите, што мислам дека нема да се случи. Средствата ќе се вратат од наредниот буџет, од сегашниот не е возможно зашто е веќе крај на годината, вели Битиќи
Вицепремиерот за економски прашања Фатмир Битиќи не верува дека Законот за солидарен данок ќе биде оспорен од Уставниот суд, но доколку тој „падне“ од Судот, средствата на компаниите ќе им се враќаат од буџетот наредната година.
Тој вели дека до овој момент компаниите имаат законска обврска да го плаќаат солидарниот данок, а средствата кои ќе бидат собрани, Битиќи повтори дека се наменети за антикризни мерки, кои рече дека треба да бидат соопштени наредните денови.
„За следната година, бидејќи правиме проекции на буџетот и бидејќи кризата е сѐ уште активна, ќе има средства за антикризни мерки. Ако евентуално прејудицираме дека таква одлука може да се донесе, мислам дека има доволно испланирани средства во државната каса, но првично, намената е за антикризни мерки. Ако има таква одлука, тогаш ќе треба да се земат од граѓаните и да им се вратат на компаниите што мислам дека нема да се случи. Средствата ќе се вратат од наредниот буџет, од сегашниот не е возможно зашто е веќе крај на годината“,
рече Битиќи одговорајќи на новинарски прашања по промоцијата на проектот „Зелен финансиски инструмент за подобрување на квалитетот на воздухот и борба со климатските промени во Северна Македонија“.
Во однос на тоа што ќе се случи доколку Уставниот суд донесе решение дека Законот за данок за солидарност е неуставен и дали уплатените средства ќе им бидат вратени на компаниите, во вторникот директорката на Управата за јавни приходи, Сања Лукаревска, рече дека одлука за постапување ќе донесат кога ќе го видат известувањето од Уставен и зависно од тоа какво ќе биде.
Лукаревска рече дека Управата за јавни приходи на 6 ноември ќе достави опомени до оние компании кои го немаат платено данокот на солидарност, а доколку и потоа нема направено уплата, на 24 ноември веќе ќе се пристапи кон блокирање на нивните сметки.
Според податоците што ги презентираше Лукаревска, пријавена обврска за плаќање на данокот на солидарност имале 150 даночни обврзници. Лукаревска рече дека вкупната сума на средства што се уплатени заклучно до денес е 2 210 108 927 денари.
Стопанската комора на Северна Македонија на 13 октомври поднесе Иницијатива за поведување постапка за оценување на уставноста на Законот за данок за солидарност пред Уставниот суд, со предлог за донесување решение за запирање на извршувањето на поединечните акти и дејствија донесени врз основа на оспорениот Закон, до донесување на конечната одлука.
Законот за данок на солидарност помина на Владата кон средината на јули, а Собранието го донесе на 19 септември по скратена постапка, со европско знаменце.
Данокот за солидарност се однесува на сите компании кои минатата година оствариле приход поголем од 10 милиони евра и имаат поголема добивка за 20 отсто од четиригодишниот просек. Разликата во приходите кои го надминуваат просекот ќе им биде оданочена со 30 отсто. Со оваа еднократна давачка се очекува во буџетот да се соберат средства кои би се искористиле за антикризни мерки.